Amérika dölet mejlisidiki jumhuriyetchiler wang yang, chén chüen'go qatarliq xitay emeldarlirini jazalashni telep qildi

Amérika dölet mejlisining 150 neper jumhuriyetchi ezasi dölet bixeterlik istiratégyesi heqqide doklat teyyarlap, tramp hökümitining kishilik hoquqni depsende qiliwatqan xitay emeldarlirini “Qattiq jazalishi” ni telep qilghan. Doklatta jazalash nishani xitayning “Shinjang siyasiti” ge mes'ul siyasiy byuro da'imiy ezasi wang yang, “Xongkong siyasiti” ge mes'ul siyasiy byuro da'imiy ezasi xen jéng, Uyghur aptonom rayonluq partkom sékrétari chén chüen'go qatarliq emeldarlirini öz ichige alghan.

Doklatta tekitlinishiche, bu emeldarlargha “Misli körülüp baqmighan eng qattiq émbargo yürgüzülüp, qattiq jazalinishi kérek” iken. “Amérikani kücheytish we yer shari tehditlerge taqabil turush” namliq 115 betlik mezkur doklatni “Jumhuriyetchiler tetqiqat komitéti” teyyarlighan. “Jumhuriyetchiler tetqiqat komitéti” bolsa amérika dölet mejlisining 150 neper jumhuriyetchi ezasidin teshkil tapqan. Doklat 5 bölekke bölün'gen bolup, uning 3-bölüki xitayning kishilik hoquq depsendichilikini tosushqa qaritilghan.

Uningda, wang yang, xen jéng, xitay jama'et xewpsizlik ministiri jaw kéji, Uyghur aptonom rayonluq partkom sékrétari chén chüen'go, tibet aptonom rayonluq partkom sékrétari wu yingjyé, xongkong-makaw ishxanisining mudiri shya bawlong, xongkong merkizi hökümet alaqilishish ishxanisining bashliqi lu xuyning we xitay birliksep bölümining barliq emeldarlirini jazalash telep qilin'ghan. Doklatta tekitlinishiche, bu kishiler “Shinjang, tibet we xitayning bashqa jayliridiki kishilik hoquq depsendichiliklirige jawabkar bolushi kérek” iken.