"Washin'gton pochtisi" géziti: " Uyghur baliliri medeniyet qirghinchiliqining qurbanliridur"

Muxbirimiz erkin
2020-01-13
Élxet
Pikir
Share
Print

"Washin'gton pochtisi" géziti tehrirat maqalisi élan qilip, xitayning "Yataqliq mektepliri"diki Uyghur balilarning  medeniyet qirghinchiliqining qurbanlirigha aylan'ghanliqi, amérika dölet mejlisining Uyghur kishilik hoquq qanunini téz maqullap, bu qirghinchiliqining jawabkarlirigha imbargo yürgüzüshning yolini échishi kéreklikini bildürgen. Maqalide qeyt qilinishiche, eger Uyghur rayonidiki "Bu wehshilikke téz arida xatime bérilmise pütün dunya : xitayning bir rayoni jaza lagérini yolgha qoyiwatqan ehwalda uning yene bir shehride 2022‏-yilliq qishliq olimpik musabiqisi ötküzülse bolamdu?  dégen so'alni sorishi kérek" iken.

"Washin'gton pochtisi" gézitining mezkur tehrirat maqalisi "Uyghur kishilik hoquq qanun layihesi amérika awam palatasida maqullinip, kéngesh palatasida  awazgha qoyulushni kütüp turghan, amérikadiki Uyghurlar kéngshesh palatasining mezkur qanun layihesini tézraq awazgha qoyushini telep qiliwatqan bir mezgilde élan qilindi. Tehrirat maqaliside, "Nyu-york waqti" gézitining yéqinda élan qilghan xewiri neqil keltürülgen. Xewerde, xitayning Uyghur en'enilirini yoqitish urunushining balilardin bashlan'ghanliqi, Uyghur balilirining ata-aniliridin ayriwétilgenliki, ularning "Yataqliq mektepler"de ménge yuyush obyéktigha aylan'ghanliqi tekitlinip, xitayning pilani "Balilarning éngidiki Uyghur tili, medeniyitini yuyup tashlap, uning ornigha xitayda hakimiyet béshidiki kompartiyege we xitay en'enilirige bolghan hörmetni dessitishtur "déyilgenidi.  Maqalide yene gérmaniyelik Uyghurshunas adri'an zénzning sözi neqil keltürülüp, Uyghur rayonidiki Uyghurlar köp sanliq jaylarda yeslilerning shiddetlik köpeygenliki tekitlen'gen.

Maqalide qeyt qilinishiche, yéqinqi yillarda yeslilerge tizimlan'ghan balilar xitayning memliketlik otturiche sewiyesidin 12 hesse ashqan bolup, bu ehwalni ularning ata-anilirining tutqun qilinip, lagérlargha qamilishi keltürüp chiqarghaniken.

"Washin'gton pochtisi" géziti tehrirat maqaliside, xitayning Uyghur balilirigha qarita ularning eng sezgür, méngisi eng yumran waqtida medeniyet qirghichiliqi we ijtima'iy layihelesh élip bériwatqanliqini bildürgen.

Toluq bet