"Washin'gton pochtisi géziti" : "Uyghur mesilisi amérika siyasiy sehnisidiki reqiblerni birleshtürdi"

Muxbirimiz erkin
2019-03-15
Élxet
Pikir
Share
Print

Amérika'iliq zhurnalist we obzorchi josh rogin 15‏-mart "Washin'gton pochtisi géziti" de maqale élan qilip, Uyghur mesilisining amérika siyasiy sehnisidiki reqiblerni ittipaqlashturghanliqini bildürdi.

Uning "Uyghurlar üchün ortaq heriket" serlewhilik maqaliside ilgiri sürüshiche, jumhuriyetchiler bilen démokratlar otturisida tashqi siyaset, idé'ologiye jehetlerde nahayiti chong hang bolsimu, lékin xitayning Uyghur musulmanlirigha, bashqa étnik we diniy guruppilargha tutqan qorqunchluq mu'amilisi ularni birleshtürüwatqan amilgha aylan'ghan.

Josh rogin, amérika tashqi ishlar ministirliqining 13‏-mart élan qilghan yilliq doklati we xitayning Uyghurlarni teqiblesh siyasiti heqqide toxtilip, weziyetni yéqindin közitiwatqanlar üchün rayondiki bu hadisiler tonushluq bolsimu, lékin tramp hökümitining dölet mejlisige qoshulup, xitayning basturush siyasitige, uning xitaydiki diniy we étnik kimliklerni yoqitish herikitige éghizida bolsimu ashkara qarshi turushi bir yéngiliq iken.

U amérika tashqi ishlar ministirliqi diniy ishlar bash elchisi sam browénbekning sözini neqil keltürüp, uning "Xitay étiqad bilen urush qilmaqta. Bu, u héchqachan yéngelmeydighan bir urushtur, dégenlikini tekitligen.

U, amérika dölet mejlisining "Uyghur kishilik hoquq qanun lahiyesi" ge kapalet bergen 39 neper dölet mejlisi ezasining ichide jumhuriyetchi awam palata ezasi kristofir simit, démokratik awam palata ezasi ilxan ömer, démokratik awam palata ezasi adam shéf, jumhuriyetchi awam palata ezasi mark médowdek tashqi siyaset we idé'ologiye jehetlerde qarmu-qarshi septiki siyasetchilerning barliqini ilgiri sürgen.

Josh rogin maqalisining axirida, Uyghur mesilisining washin'gton we bashqa gherb paytextliridiki xitay kompartiyesining tehditige qarita zor oyghinish we birlikning peqet bir qismi ikenlikini tekitligen. Uning ilgiri sürüshiche, Uyghur mesilisini tilgha élip qoyushla kupaye qilmaydiken. U: "Dunyaning heriketke ötüsh waqti keldi" dégen.

Toluq bet