“Washin'gton pochtisi” ning tehriri, xitayning “Irqiy qirghinchiliq” olimpikige wakaletchi bolghan xelq'ara shirketlerni tenqid qildi

“Washin'gton pochtisi” gézitining tehriri fred xayt 4-aprél maqale élan qilip, 2022-yilliq béyjing qishliq olimpik musabiqisige wakaletchi bolghan xelq'ara shirketlerning Uyghur “Irqiy qirghinchiliq” ni körmeske salghanliqini tenqid qilghan. Uning tekitlishiche, kishilik hoquq, erkinlik, irqiy, étnik, jinsiy barawerlikni terghib qilip kelgen bu shirketler Uyghurlar mesiliside izchil bolmighan. Fred xayt “Shirketler heqiqeten irqiy qirghinchiliq olimpikige wakaletchi bolushni xalamdu” mawzuluq maqaliside, koka kola, P%G, samsung, intél, dow we toyota qatarliq 15 xelq'araliq shirketni tenqid qilghan.

Fred xayt amérika tashqi ishlar ministirliqining yilliq kishilik hoquq doklatida, xitayning Uyghur we bashqa musulman az sanliq guruppilargha “Irqiy qirghinchiliq” we “Insaniyetke qarshi jinayet” sadir qilghanliqi tekitlen'genlikini bildürüp, bu ehwalda “Kola kola, wiza, hemmebap éléktr we olimpik musabisigha wakaletchi bolghan bashqa 12 shirket kéler yili 2-aydiki musabiqini héchqandaq ish bolmighandek ötküzemdu?” dep so'al qoyghan.

Maqalide yene “Bu shirketler bizning Uyghur ayalliri basqunchiliqqa uchrawatqan, tughmasliqqa we pahishilikke mejburliniwatqan waqitta ular özlirining jinsiy barawerlikni tebriklishige jiddiy mu'amile qilishimizni kütemdu?” dep körsitilgen. Maqalide éytilishiche, béyjing qishliq olimpikige yene 10 ay qalghan bir waqitta bu shirketler xitay hökümitige “Lagérdikiler qoyup bérilsun, Uyghurlarning tinch yashishigha yol qoyulsun, tashqiridiki közetküchilerning bérip séning némilerni qilghanliqingni körüshige yol qoyulsun, musabiqini andin bashlayli déyishi kérek” iken.