“вашингтон почтиси” : уйғур қирғинчилиқиниң қабаһәтлирини йошурғили болмайду

Америка оқурмәнлиригә әң тонушлуқ болған гезитләрдин “вашингтон почтиси” гезити 15-июн күни тәһрират мақалиси елан қилип “уйғур қирғинчилиқиниң қабаһәтлирини йошурғили болмайду” дәп көрсәтти.

Мәзкур тәһрират мақалиси хитай һөкүмитиниң америка қошма шитатлирида турушлуқ баш әлчиси сүй тйәнкәйниң май ейида елан қилинған язма баянатиға рәддийә тәриқисидә йезилған. Сүй тйәнкәй өз баянатида “шинҗаңда өткән 20 нәччә йил мабәйнидә көп қетимлап террорлуқ һәрикәтлири көрүлгәнлики үчүн һөкүмитимиз террорлуқ вә әсәбийликниң алдини елиш үчүн бир қатар тәдбирләрни қолланди. Америка вә башқа җайлардики дүшмән күчләр болса нөвәттә шинҗаңда қирғинчилиқ болуватиду, демәктә. Бу пүтүнләй иғва” дегән. Шундақла өткән 40 йилда уйғур нопусиниң 10 һәссә көпәйгәнликини буниңға мисал қилған.

“вашингтон почтиси” ниң тәһрират мақалисидә буниңға рәддийә берилип, нөвәттә аллиқачан бир милйондин артуқ уйғурниң лагерларға қамилип болғанлиқи, буниңға яндаштурулуп мәҗбурий әмгәк, уйғурларниң миллий вә диний кимликини өзгәртиш урунуши дегәнләрниң әң юқири пәллигә чиққанлиқи әскәртилиду. Шундақла тәтқиқатчи адрян зензниң уйғур нопуси һәққидики әң йеңи доклатидин нәқил елинип, хитай һөкүмитиниң уйғур нопусиниң үстүнлүкини бузуп ташлаш, уйғурларниң туғут нисбитини контрол қилиш, уйғур дияриға хитай көчмәнлирини көпләп маканлаштуруш қатарлиқ чарилар билән уйғурларни техиму тез ассимилятсийә қилмақчи болуватқанлиқи алаһидә тәкитлиниду.

Мақалида йәнә хитай һөкүмитиму имза қойған “бирләшкән дөләтләр тәшкилати қирғинчилиқниң алдини елиш әһдинамиси” дики алақидар маддилар вә “хәлқара кәчүрүм тәшкилати” ниң әң йеңи доклати асасида уйғурларниң ирқий қирғинчилиққа учраватқанлиқи муәййәнләштүрүлүп “мәйли хитай рәһбәрлири буни қанчилик инкар қилсун, уларниң бу қирғинчилиқни йошурушиға һечқандақ имкан қалмиди” дәп көрситиду.