"Washin'gton pochtisi" : Uyghur qirghinchiliqining qabahetlirini yoshurghili bolmaydu

Muxbirimiz eziz
2021-06-15
Share

Amérika oqurmenlirige eng tonushluq bolghan gézitlerdin "Washin'gton pochtisi" géziti 15-iyun küni tehrirat maqalisi élan qilip "Uyghur qirghinchiliqining qabahetlirini yoshurghili bolmaydu" dep körsetti.

Mezkur tehrirat maqalisi xitay hökümitining amérika qoshma shitatlirida turushluq bash elchisi süy tyenkeyning may éyida élan qilin'ghan yazma bayanatigha reddiye teriqiside yézilghan. Süy tyenkey öz bayanatida "Shinjangda ötken 20 nechche yil mabeynide köp qétimlap térrorluq heriketliri körülgenliki üchün hökümitimiz térrorluq we esebiylikning aldini élish üchün bir qatar tedbirlerni qollandi. Amérika we bashqa jaylardiki düshmen küchler bolsa nöwette shinjangda qirghinchiliq boluwatidu, démekte. Bu pütünley ighwa" dégen. Shundaqla ötken 40 yilda Uyghur nopusining 10 hesse köpeygenlikini buninggha misal qilghan.

"Washin'gton pochtisi" ning tehrirat maqaliside buninggha reddiye bérilip, nöwette alliqachan bir milyondin artuq Uyghurning lagérlargha qamilip bolghanliqi, buninggha yandashturulup mejburiy emgek, Uyghurlarning milliy we diniy kimlikini özgertish urunushi dégenlerning eng yuqiri pellige chiqqanliqi eskertilidu. Shundaqla tetqiqatchi adryan zénzning Uyghur nopusi heqqidiki eng yéngi doklatidin neqil élinip, xitay hökümitining Uyghur nopusining üstünlükini buzup tashlash, Uyghurlarning tughut nisbitini kontrol qilish, Uyghur diyarigha xitay köchmenlirini köplep makanlashturush qatarliq charilar bilen Uyghurlarni téximu téz assimilyatsiye qilmaqchi boluwatqanliqi alahide tekitlinidu.

Maqalida yene xitay hökümitimu imza qoyghan "Birleshken döletler teshkilati qirghinchiliqning aldini élish ehdinamisi" diki alaqidar maddilar we "Xelq'ara kechürüm teshkilati" ning eng yéngi doklati asasida Uyghurlarning irqiy qirghinchiliqqa uchrawatqanliqi mu'eyyenleshtürülüp "Meyli xitay rehberliri buni qanchilik inkar qilsun, ularning bu qirghinchiliqni yoshurushigha héchqandaq imkan qalmidi" dep körsitidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet