"Washin'gton pochtisi" géziti: "Jaza lagérlirigha a'it yéngi ispatlar xitayning Uyghurlarni yoqitish iradisini yenimu qet'iyleshtürgenlikini körsitip bermekte"

Muxbirimiz irade
2020-09-04
Élxet
Pikir
Share
Print

"Washin'gton pochtisi" géziti 3-séntebir küni "Jaza lagérlirigha a'it yéngi ispatlar xitayning Uyghurlarni yoqitish iradisini yenimu qet'iyleshtürgenlikini körsitip bermekte" mawzuluq bir parche tehrirat maqalisi élan qildi.

Mezkur maqalide xitay hökümet emeldarliri izchil halda Uyghur élide jaza lagérlirining mewjutluqini ret qiliwatqan bolsimu, biraq buning chinliqini ispatlaydighan yenimu köp delil-ispatlarning ashkariliniwatqanliqini bildürgen. Ular buningda asasliq aldinqi hepte, yeni 27-awghust küni amérikadiki "BuzzFeed" namliq xewer tori teripidin tekshürüp chiqilghan yéngi bayqashlarni misal qilip körsitip, töwendikilerni bayan qilghan: "BuzzFeed Ning yéngi bayqashliri xitay hökümitining yenimu qattiq iradisini we menggülük pilanini namayan qilidu. Yeni xitay hökümiti Uyghur medeniyitini yoqitishtin ibaret bu iradisini yenimu chingitqan."

"BuzzFeed" xewerler tori aldinqi hepte Uyghur élidiki lagérlarning sani we ornigha a'it bir parche yéngi tekshürüsh doklati élan qilghan idi. Ular gugul sün'iy hemrah körünüshliri we xitayning "Beydu" toridiki sün'iy hemrah körünüshliri bilen sélishturush we shundaqla lagér shahidlirini ziyaret qilish netijiside, 2017-yildin buyan rayonda yasalghan 260 din artuq lagérning ornini tépip chiqqan idi.

Ular xitayning "Beydu" torida xeritidin "Öchürüwétilgen" orundin 50 mingdin oshuqni bayqighan we tutup turush merkezliri, türmiler we lagérlarning alahidiliki bar bolghan 10 minggha yéqin orunni nuqtiliq tekshürgen. Idi. Ular xewiride Uyghur élide bundaq eslihelerning kölimining hélihem kéngeytiliwatqanliqini we ularning bixeterlik-nazaret tedbirlirining yenimu qattiqliqini bildürgen idi.

"Washin'gton pochtisi" gézitining tehrirat hey'iti maqaliside mana bu nuqtini alahide tekitlep mundaq dégen: "Bu yéngi bayqashlar amérika hökümiti we bashqilarning xitayni tenqidlishi we jaza tedbiri qoyushi xitayning zulumlirini astilitalmighanliqini körsitip berdi. Démek, yenimu köp ishlarni qilish kérek. Amérika hökümiti yéqindin buyan kishilik hoquq we emgek teshkilatliri shinjangdiki mejburiy emgekke chétishliq dep élan qilghan barliq tawarlarni import qilishni cheklishi kérek."

Mezkur tehrirat maqalisining axirida dunya jama'etchilikige xitab qilip, mundaq dep yazghan: "Pütün dunya xelqi öz ichidiki bir xelqni pütkül millet gewdisi bilen asta-asta boghuwatqan xitayning 2022-yilliq qishliq olimpik tenheriket musabiqisini ötküzidighan exlaqiy salahiyiti barmu, dégen so'alni sorishi kérek. Biz 'xitayda bundaq salahiyet yoq, ' dep qaraymiz."

Toluq bet