“Washin'gton pochtisi” géziti: “Xitay jinsiy xorlashni musulman ayallirigha qarshi bir xil qoral süpitide ishletmekte”
“Washin'gton pochtisi” géziti 7-öktebir küni maqale élan qilip, lagérlardiki Uyghur, qazaq ayal tutqunlirining omumiyyüzlük jinsiy xorlashqa uchrawatqanliqi, xitayning bu qilmishi ayallarni tughush iqtidaridin mehrum qilishqa qaritilghan dep qariliwatqanliqi we irqiy qirghinchiliq, dep eyibliniwatqanliqini ilgiri sürgen.
-
Muxbirimiz erkin
2019-10-07 -
-
-
“Washin'gton pochtisi” géziti 7-öktebir küni maqale élan qilip, lagérlardiki Uyghur, qazaq ayal tutqunlirining omumiyyüzlük jinsiy xorlashqa uchrawatqanliqi, xitayning bu qilmishi ayallarni tughush iqtidaridin mehrum qilishqa qaritilghan dep qariliwatqanliqi we irqiy qirghinchiliq, dep eyibliniwatqanliqini ilgiri sürgen.
“Washin'gton pochtisi” gézitining mezkur maqaliside qazaqistan, türkiye, awstraliye qatarliq döletlerdiki lagérda yétip chiqqan Uyghur we qazaq shahitlar guwahliq bergen. Ularning guwahliq bérishiche, lagérlarda da'irilerning Uyghur, qazaq ayal tutqunlirigha basqunchiliq qilishi, hamildarlar ayallarning balisini mejburiy chüshüriwétishi we ularni tughmas qiliwétishi yaki her xil jinsiy xorlash qilmishlirida bolushi omumiyyüzlük mewjut ehwal iken.
Bir Uyghur ayal shahit özining türmide xitay qarawullirining köp qétim basqunchiliqigha uchrap, ikki qétim hamilidar bolup qalghanliqi we hamilisining chüshürüwétilgenlikini bildürüp, “ 35Yashning töwinidiki herqandaq ayal we erkek basqunchiliqqa uchraydu” dégen.
“Washin'gton pochtisi” gézitining “Xitay Uyghur musulman ayallirining hamilisini mejburiy chüshürüsh we jinsiy xorlash mesiliside irqiy qirghinchiliq bilen eyiblendi” serlewhilik maqaliside yene mutexessisler we pa'aliyetchilerning sözi neqil keltürülgen. Mutexessisler we pa'aliyetchiler xitayning meqsitining musulman ayallirini tughut iqtidaridin mehrum qaldurush ikenlikini ilgiri sürgen.
Qazaqistandiki ataqliq kishilik hoquq adwokati eyman ömerowaning “Washin'gton pochtisi” gézitige bildürüshiche, “Nöwette xitay da'iriliri ayallarning tughush iqtidaridin mehrum qilishni öz ichige alghan jinsiy xorlash qilmishini musulman ayallirigha qarshi bir xil qoral süpitide ishletmekte” iken. Maqalide yene “Uyghur herikiti” teshkilatining mes'uli roshen abbasning sözi neqil keltürülgen bolup,u xitayning bu qilmishlirining hemmisi b d t irqiy qirghinchiliqqa qarshi turush ehdinamisidiki “Irqiy qirghinchiliq tebirlirige chüshidu” dégenliki tekitlen'gen.