«Вашингтон почтиси» гезити: «хитай җинсий хорлашни мусулман аяллириға қарши бир хил қорал сүпитидә ишләтмәктә»

Мухбиримиз әркин
2019-10-07
Елхәт
Пикир
Share
Принт

«Вашингтон почтиси» гезити 7‏-өктәбир күни мақалә елан қилип, лагерлардики уйғур, қазақ аял тутқунлириниң омумиййүзлүк җинсий хорлашқа учраватқанлиқи, хитайниң бу қилмиши аялларни туғуш иқтидаридин мәһрум қилишқа қаритилған дәп қариливатқанлиқи вә ирқий қирғинчилиқ, дәп әйиблиниватқанлиқини илгири сүргән.

«Вашингтон почтиси» гезитиниң мәзкур мақалисидә қазақистан, түркийә, австралийә қатарлиқ дөләтләрдики лагерда йетип чиққан уйғур вә қазақ шаһитлар гуваһлиқ бәргән. Уларниң гуваһлиқ беришичә, лагерларда даириләрниң уйғур, қазақ  аял тутқунлириға басқунчилиқ қилиши, һамилдарлар аялларниң балисини мәҗбурий чүшүриветиши вә уларни туғмас қиливетиши яки һәр хил җинсий хорлаш қилмишлирида болуши омумиййүзлүк мәвҗут әһвал икән.

Бир уйғур аял шаһит өзиниң түрмидә хитай қаравуллириниң көп қетим басқунчилиқиға учрап, икки қетим һамилидар болуп қалғанлиқи вә һамилисиниң чүшүрүветилгәнликини билдүрүп, « 35яшниң төвинидики һәрқандақ аял вә әркәк басқунчилиққа учрайду» дегән.

«Вашингтон почтиси» гезитиниң «хитай уйғур мусулман аяллириниң һамилисини мәҗбурий чүшүрүш вә җинсий хорлаш мәсилисидә ирқий қирғинчилиқ билән әйибләнди» сәрләвһилик мақалисидә йәнә мутәхәссисләр вә паалийәтчиләрниң сөзи нәқил кәлтүрүлгән. Мутәхәссисләр вә паалийәтчиләр хитайниң мәқситиниң мусулман аяллирини туғут иқтидаридин мәһрум қалдуруш икәнликини илгири сүргән.

Қазақистандики атақлиқ кишилик һоқуқ адвокати әйман өмәрованиң «вашингтон почтиси» гезитигә билдүрүшичә, «нөвәттә хитай  даирилири аялларниң туғуш иқтидаридин мәһрум қилишни өз ичигә алған җинсий хорлаш қилмишини мусулман аяллириға қарши бир хил қорал сүпитидә ишләтмәктә» икән. Мақалидә йәнә «уйғур һәрикити» тәшкилатиниң мәсули рошән аббасниң сөзи нәқил кәлтүрүлгән болуп,у хитайниң бу қилмишлириниң һәммиси б д т ирқий қирғинчилиққа қарши туруш әһдинамисидики «ирқий қирғинчилиқ тәбирлиригә чүшиду» дегәнлики тәкитләнгән.

Пикирләр (0)
Share
Толуқ бәт