Сам бровнбәк: “ватикан шәйтан билән келишим түзмәслики, бәлки уни қоғливетиши керәк”

Мухбиримиз җәвлан
2021.05.18

Американиң сабиқ хәлқара диний әркинлик баш әлчиси сам бровнбәк ватиканни коммунист хитай һөкүмитигә қаратқан юмшақ сиясити һәққидә қайта ойлинишқа чақирған. У алдинқи һәптә католик дини агентлиқи (CNA) ниң зияритини қобул қилғанда мундақ дегән: “ватиканниң әхлақ нопузи наһайити муһим. Сиз шәйтан билән келишим түзмәсликиңиз, бәлки уни қоғливетишиңиз керәк”.

“брайтбарт хәвәрлири” (Breitbart News) ториниң 17-май күни бәргән хәвиридә ейтилишичә, америка ташқий ишлар министирлики хәлқара диний әркинлик йиллиқ доклатини елан қилғандин кейин, сам бровнбәк ватиканниң хитайдики диний зиянкәшликкә диққәт қилишини үмид қилип мундақ дегән: “бу доклат хитайниң һәр хил динларға қозғиған һуҗумини хатирилигән. Хитай һөкүмити бир коммунист һакимийәт, коммунистлар динға ишәнмәйду. Улар һәммидин улуғ әхлақ игиси, йәни илаһ билән вә һәр қандақ шәкилдики етиқад билән чиқишалмайду. Улар мәйли тибәт буддистлири, аиливи черкавда ибадәт қилидиған хиристиян мухлислири, йәр асти католик дини җәмийити әзалири, фалунгуң муртлири яки уйғурлар болсун, һәммисигә һуҗум қилиду”.

Сам бровнбәк ватиканниң әзәлдин хитайдики еғир кишилик һоқуқ дәпсәндичиликини әйибләп бақмиғанлиқини тилға елип, ватиканни бу хил юмшақ сиясәттин ваз кечишкә чақириқ қилған һәмдә ватиканниң өз нопузидин пайдиллинип, бесим қилалайдиған хитай әмәлдарлириниң тизимликини бәргән.

Хәвәрдә көрситилишичә, ватикан папаси франсис вә башқа ғоллуқ роһанийлар гәрчә башқа җайлардики диний зулумни аяғлаштурушқа чақириқ қилип кәлгән болсиму, хитайниң диний етиқад әркинликигә тохтимай бузғунчилиқ қилиш җинайитини тәнқидләштин өзини қачуруп кәлгән. Папа франсис һәтта хитайни мәдһийәләп, хитай компартийәсиниң диний етиқад әркинликини қоғдаватқанлиқини, хитайдики ибадәтханиларниң ават икәнликини ейтқан. У һәтта католик дини җәмийитиниң қаидисини бузуп, хитайдики католик дини попини хитай компартийәсиниң башқурушидики хитай католик дини вәтәнпәрвәрлик җәмийитигә әза болушқа йол қойған.

Сам бровнбәкниң ейтишичә, ватикан американиң 20 йил аввал өткүзгән хаталиқини садир қилмақта, йәни америка өз вақтида хитайға дуня содисини ечип берип, хитайниң демократийәгә қарап меңишини үмид қилған, ватиканму охшашла мушундақ хам хиялда болмақта. Бровнбәк мундақ дегән: “хитай билән сөһбәтлишишниң ғәрб дөләтлиригә қилчә пайдиси йоқ, мәнчә ватикан үчүнму шундақ”.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.