Ватикан тәрәп хитай һөкүмити билән келишиш мәсилисидә күчлүк тәнқидкә учримақта

Мухбиримиз ирадә
2018.02.15

Ватикан билән хитай һөкүмитиниң хитай ичидики черкавларға поп бекитиштә пикир бирлики һасил қилғанлиқи һәққидики хәвәрләр тарқалғандин кейин, ватикан бу җәһәттә күчлүк тәнқидләргә дуч кәлмәктә.

Бүгүн “канада” намлиқ хәвәр бетидә, “поп хитайдики христианларни бейҗиңниң залим реҗимиға ташлап бәрдиму” мавзулуқ бир парчә обзор елан қилинди. Мәзкур обзорда ватикан попи фиранчисниң дунядики мусапирлар мәсилиси, килимат вә аялларға қарши зораванлиқ қатарлиқ мәсилиләрдә һәр даим һәқ тәрәптә туруп адиллиқ билән пикир баян қилған болсиму, әмма хитайға кәлгәндә охшаш мәйданни ипадә қилалмиғанлиқи, әксичә хитай ичидики черкавларға поп бекитиштә хитай һөкүмити билән келишкәнлики тәнқид қилинған.

Мақалидә хитай һөкүмитиниң хитайдики христиан муритлириғиму худди өз ичидики тибәт буддистлири вә уйғур мусулманлириға бесим қилғанға охшаш бесим қилип кәлгәнлики тилға елинған. Мақалидә өткән он йилдин буян уйғур мусулманлириниң көрүлүп бақмиған дәриҗидики бесим вә зиянкәшликләргә учриғанлиқи, уларниң ана юртиниң һазир дунядики әң мукәммәл сақчи дөлитигә айланғанлиқи, уйғурларниң бихәтәрлик тәкшүрүш өткәллири, “йепиқ тәрбийәләш мәркәзлири”, юқири техникилиқ назарәт вә динға қарши тәшвиқат қурбаниға айлиниватқанлиқи баян қилинған.

Мақалидә, ватикан даирилириниң өз пуқралириға юқириқидәк бесим қиливатқан бир һакимийәт билән келишишиниң қобул қилғили болмайдиған бир пакитлиқи әскәртилгән.

Мәлум болушичә, илгири ватикан билән хитай һөкүмити хитайдики черкавларға поп бекитиштә изчил зиддийәтлишип кәлгән. Бирақ хәвәрләрдин икки тәрәпниң бу нуқтида келишкәнлики вә хитайда 100 дин артуқ черкав попиниң хитай қоллайдиған кишиләрдин таллиниватқанлиқи, буниңға ватиканниңму рази болғанлиқи илгири сүрүлмәктә. Хоңкоңниң сабиқ католик кардинали җосеф зен болса ватиканни “хитайға сетилди” дәп қаттиқ тәнқидлигән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.