Wén'gériye hökümiti budapéshtta fuden uniwérsitétining shöbisini qurushni kéchiktüridighanliqini bildürgen

Wén'giriye hökümiti budapésht sheher xelqining 5-iyun partlighan keng kölemlik naraziliq namayishidin kéyin budapésht shehride xitayning fuden uniwérsitétining shöbisini qurush pilanini kéchiktüridighanliqi we bu pilanni 2023-yili budapésht xelqining omumiy ‍awazigha qoyidighanliqini élan qilghan.

Fuden uniwérsitétining 1 milyart 800 milyon dollar meblegh sélip qurushni pilanlighan müzkur shöbe mektipi wén'giriye hökümitining qollishigha érishken bolsimu, biraq bu qurulush budapésht xelqining qarshiliqigha uchrighan.

Budapésht shehirining bashliqi gérgili karasoni ‍ötken hepte shöbe mektep qorusining yénidiki bir kochigha “Uyghur qurbanlar kochisi”, yene bir kochigha tibet diniy dahiysi dalay lamaning ismi bergenlikini élan qilghan. 5-Iyun küni budapésht shehrining minglighan ahalisi namayish qilip, bu qurulushqa qarshi turghan. Wén'giriyediki “Mandinér” heptilik zhurnilining xewer qilishiche, wén'giriye bash ministiri wiktor orban hökümitining bir kabinét ministiri yekshenbe küni hökümetning bu qurulushni 2023-yili budapésht xelqining awazigha qoyudighanliqini bildürgen.

CNN Ning xewer qilishiche, ‍öktichiler bash ministir orbanni xitaygha yaxshichaq bolush bilen eyibligen, shundaqla bu qurulush wén'giriye aliy ma'aripning süpitini chüshüriwétidighanliqi hemde béyjingning wén'giriye we yawropa ittipaqidiki tesirini kücheytidighanliqini ilgiri sürgen. Melum bolushiche, fuden uniwérsitétining bu qurulushqa salidighan meblighi wén'giriyening aliy ma'aripgha ajratqan bir yilliq xam chotidinmu köp ‍iken.