Вукән кәнтидики 9 деһқан җәмийәтни қалаймиқан қилиш билән әйиблинип сотланди

Мухбиримиз меһрибан
2016-12-27
Елхәт
Пикир
Share
Принт

Хитай хәвәрлиридин мәлум болушичә, 26-декабир дүшәнбә күни даириләр сот ечип, гуаңдуң өлкиси луфиң шәһири вукән кәнтидики 9 нәпәр деһқанни қанунсиз йиғилиш өткүзүп, җәмийәтни қалаймиқан қилиш билән әйибләп 2 йилдин 10 йилғичә муддәтлик қамақ җазасиға һөкүм қилған.

Даириләрниң вукән кәнтидә демократийини тәләп қилған 9 деһқанни җазалиши, чәтәлләрдики хитай паалийәтчилириниң диққитини қозғиди. Америкида муһаҗирәттә яшаватқан вукән кәнт пуқраси җуаң лехуң радийомиз зияритини қобул қилғинида, хитай һөкүмитини тәнқидләп: «даириләрниң вукәндә демократийини тәләп қилип, һөкүмәт кадирлириниң чириклики үстидин шикайәт қилған деһқанларни бундақ еғир җазалиши, хитайда һөкүмәткә қарши пикир бәргүчиләрниң бастурулуватқанлиқиниң испати» деди. Радийомиз вукән йезисиға телефон қилип, вукәндики деһқанларниң 9 нәпәр кәнт пуқрасиниң җазалинишиға қарита пикрини елишқа тиришқан болсиму, әмма деһқанлар өзлириниң бу хил сәзгүр мәсилиләргә җаваб беришни рәт қилидиғанлиқини билдүрди.

Бирқанчә йил илгири, хитайда тунҗи болуп демократик сайлам арқилиқ кәнт башлиқини сайлап чиққанлиқи билән хәлқара таратқуларда хәвәр қилинған вукән кәнтидә йүз бәргән вәқәләр, йеқинқи бирқанчә йилдин буян үзлүксиз һалда хәлқара таратқулар, кишилик һоқуқ тәшкилатлири вә хитай паалийәтчилириниң диққәт нишани болмақта.

Пикирләр (0)
Share
Толуқ бәт