Wuken kentidiki 9 déhqan jem'iyetni qalaymiqan qilish bilen eyiblinip sotlandi

Xitay xewerliridin melum bolushiche, 26-dékabir düshenbe küni da'iriler sot échip, gu'angdung ölkisi lufing shehiri wuken kentidiki 9 neper déhqanni qanunsiz yighilish ötküzüp, jem'iyetni qalaymiqan qilish bilen eyiblep 2 yildin 10 yilghiche muddetlik qamaq jazasigha höküm qilghan.

Da'irilerning wuken kentide démokratiyini telep qilghan 9 déhqanni jazalishi, chet'ellerdiki xitay pa'aliyetchilirining diqqitini qozghidi. Amérikida muhajirette yashawatqan wuken kent puqrasi ju'ang léxung radiyomiz ziyaritini qobul qilghinida, xitay hökümitini tenqidlep: “Da'irilerning wukende démokratiyini telep qilip, hökümet kadirlirining chirikliki üstidin shikayet qilghan déhqanlarni bundaq éghir jazalishi, xitayda hökümetke qarshi pikir bergüchilerning basturuluwatqanliqining ispati” dédi. Radiyomiz wuken yézisigha téléfon qilip, wukendiki déhqanlarning 9 neper kent puqrasining jazalinishigha qarita pikrini élishqa tirishqan bolsimu, emma déhqanlar özlirining bu xil sezgür mesililerge jawab bérishni ret qilidighanliqini bildürdi.

Birqanche yil ilgiri, xitayda tunji bolup démokratik saylam arqiliq kent bashliqini saylap chiqqanliqi bilen xelq'ara taratqularda xewer qilin'ghan wuken kentide yüz bergen weqeler, yéqinqi birqanche yildin buyan üzlüksiz halda xelq'ara taratqular, kishilik hoquq teshkilatliri we xitay pa'aliyetchilirining diqqet nishani bolmaqta.