Amérikadiki nopuzluq metbu'atlarda shi jinping hakimiyitining “Wuxen wirusi” ni yoshurush arqiliq pütün dunyagha tehdit peyda qilghanliqi tenqid qilindi

“Nyu-york waqti géziti” ning dangliq iston yazghuchisi nikolas kiristof 29-yanwar künidiki yazmisida wuxen wirusi peyda qiliwatqan dunyawi tehditni qelemge aldi. U maqalisige “Korona wirusi tarqalmaqta, xitaydiki diktatorluqning bedilini dunya tölewatidu” dep mawzu qoyghan.

U maqalisining kirish qismida “Biz hazir shi jinpingning hakimmutleq tüzümining xitay üchün we shundaqla pütün dunya üchün tehditlikini körüwatimiz,” dégen. U maqaliside yuqumluq wirus wuxende 1-dékabir etrapida bayqalghan bolsimu, biraq hökümet orunlirining ehwalni jama'ettin yoshurush we hetta jama'etni agahlandurghan 8 kishini “Ösek söz tarqitish” bilen jazalash arqiliq xitay xelqini we dunyani bixudlashturghanliqini bayan qilghan.

Uning körsitishiche, xitay hökümiti dunya sehiye teshkilatigha ehwalni melum qilghan chaghdimu öz puqraliri téxi weqedin xewersiz yürgen. 23-Yanwar küni xitay axiri wuxen shehirini qamal astigha alghanda bolsa alliqachan 5 milyon wuxenlik sheherdin chiqip bolghan, doxturxanilar kiriziske teyyarliqsiz qélip, tekshürüsh-dawalash esliheliri yétishmesliktek aqiwetler kep chiqqan. Nikolas kiristof maqaliside yene wuxen wirusning alliqachan xitayning gherbidiki Uyghur rayonigha tarqilip, u yerdiki yighiwélish lagérlirida intayin nachar shara'it we cheklik sehiye xizmetliri astida tutup turuluwatqan bir milyondin oshuq musulman xelqining hayatigha éghir tehdit peyda qiliwatqanliqini eskertip ötken.

U maqalisining axirida shi jinpingning sépi özidin bir diktator ikenlikini eskertip: “Diktatorlar köpinche hallarda xata qararlarni chiqiridu. Chünki ular toghra uchurgha érishelmeydu. Siz musteqil pikirlerni ujuqturghiningizda, érishidighiningiz peqetla etrapingizdikilerning xushamiti we yaxshi sözliri bolidu,” dégen.

U yene “Men shi jinpingning bu xataliqi sewebidin hazir siyasiy péshkellikke uchrighan yaki uchrimighanliqini bilmeymen. Biraq u shundaq bolushi kérek. U öz-özidin pexirlinidighan bir diktator. Emma bu wirusning bedilini bolsa puqralar tölewatidu,” dep yazghan.

Bügün yene “Washin'gton pochtisi” gézitide jon pomfirt teripidin élan qilin'ghan mulahizidimu shi jinping hakimiyitining “Wuxen wirusi” ni bir terep qilish usuli tenqid qilindi.