Dunya sehiye teshkilati “Wuxen wirusi” ni “Saghlamliq boyiche yershari xaraktérlik jiddiy halet” dep élan qildi

30-Yanwar küni dunya sehiye teshkilati “Wuxen wirusi” ni “Saghlamliq boyiche yershari xaraktérlik jiddiy halet” dep élan qildi.

Mezkur organning bashliqi tédros gebriyesus axbarat élan qilish yighinida “Jiddiy halet élan qilinishining sewebi bu wirusning pütün dunyagha tehdit peyda qiliwatqanliqida” dep körsetken. U bu wirusning sehiye sistémiliri ajiz döletlerge yéyilishining zor endishe qozghawatqanliqini tekitligen.

Bbch ning bu heqtiki xewiridin qarighanda, nöwette bu wirus dunya miqyasida xitaydin bashqa yene 18 dölette bayqalghan bolup, bu döletlerdiki omumiy yuqumlan'ghuchi sani 98 neper. Yuqumlan'ghuchilar asasen wuxen'ge barghanlar bolsimu, emma yuqumlan'ghuchilarning ichidiki 8 nepiri wuxen'ge barghanlardin wirusni yuqturuwalghanlar iken.

Dunya sehiye teshkilatining bashliqi tédros gebriyesus bügün jenwede bergen bayanatida “Wuxen wirusi” ni “Körülüp baqmighan yuqum” dep atash bilen birge, uninggha qarshi élin'ghan tedbirlerningmu körülüp baqmighan derijide ikenlikini bildürgen.

“Wuxen wirusi” bilen yuqumlan'ghuchilar sani xitayda we dunya miqyasida téz sür'et bilen köpiyiwatqan bir shara'itta 30-yanwar küni rusiye xitay bilen bolghan chégrasini taqighanliqini élan qildi. Arqidin yene béritaniye, firansiye we gérmaniye qatarliq döletlerning hawa yolliri xitaygha qatnaydighan hawa qatnishini bikar qildi. Amérikadiki bir qisim hawa yolliri shirketlirimu xitaygha uchidighan seperlirini bikar qilishni oylishiwatqanliqini élan qildi.

Dunya sehiye teshkilati 2009-yilidin buyan “Qush zukami”, “Ébola wirusi” we “Zika wirusi” qatarliqlar boyiche 4 qétim jiddiy halet élan qilghan idi.