Uyghur aptonom rayonluq xelq qurultiyining amérikagha qarshi “Qarar layihesi” élan qilin'ghan

Xitay bashqurushidiki “Tengritagh tori” ning 2-séntebirdiki xewiride éytilishiche, shu küni “Shinjang Uyghur aptonom rayonluq xelq qurultiyi da'imiy komitétining amérikaning shinjang heqqidiki jaza tedbirlirige qet'iy qarshi turush we jazagha uchrighan shirket karxanilarning tereqqiyatini qollash heqqidiki qarari” (töwende qisqartip “Qarar” déyilidu) resmiy élan qilin'ghan.

Xewerde éytilishiche, Uyghur aptonom rayonluq xelq qurultiyi da'imiy komitétining 34-nomurluq uqturushi bolghan bu “Qarar” 23-awghust küni maqullan'ghan. Emma buning toluq tékisti téxi élan qilinmighan bolup, 2-séntebir küni bu “Qarar” ning toluq mezmuni ashkara bolghan. “Qarar” da éytilishiche, bu nuqtiliq halda amérika hökümiti 2022-yili 21-iyundin bashlap ijra qilishqa kirishken “Uyghur mejburiy emgikining aldini élish qanuni” gha qarshi turush meqsitide maqullan'ghan. Shundaqla mezkur qanun layihesining maqullinishi bilen Uyghur élidiki shirket karxanilarning ishlepchiqirish we sétish xizmitige éghir ziyan-zexmet yetkenlikini eskertken.

“Qarar” da amérika maqullighan mezkur qanun layihesi tenqidlinip, “Bu kishilik hoquq bayriqini kötürüwélip iqtisadiy jehettin zerbe bérish suyiqesti” déyilgen. Shuningdek amérika hökümitini mushu arqiliq xitayni iskenjige élish meqsitige yetmekchi bolghan, dep eyibligen.

 “Qarar” da éytilishiche, xitay hökümiti “Éshincha emgek küchlirini yötkep ishqa orunlashturush arqiliq Uyghurlarni bay qilmaqchi” boluwatqanda, amérika hökümiti maqullighan bu qanun layihesi bu xil ijabiy yönilishke buzghunchiliq qilish rolini oynighan. Emma Uyghur élide milyonlighan “Éshincha emgek küchliri” mewjut bolsa, néme üchün ghayet zor sanda xitay ishchilarni “Emgek küchi” namida Uyghur élige yötkeshning meqsiti heqqide “Qarar” da héchqandaq söz qilinmighan. Shuning bilen birge Uyghur élide “Héchqandaq mejburiy emgekning mewjut emesliki” tekitlen'gen.

 “Qarar” da “Shinjangdiki ishlar dölitimizning ichki mesililiri” déyish arqiliq, amérika hökümitini “Bashqa döletlerning ichki ishigha arilashqan” dep tenqidligen. Shundaqla özlirining buninggha qet'iy qarshi turidighanliqini bildürüp, “Pütün shinjangdiki yuqiri-töwen orunlarni birlikte buninggha qarshi turushqa hemde jazagha uchrighan shirket karxanilarni qollashqa chaqirimiz” déyilgen.