Chungchingda özlirini xelq wekillikige namzat körsetmekchi bolghan ikki kishi solap qoyulghan

Radiyomiz xitayche bölümining xewer qilishiche, xitayning chungching shehiride özlirini xelq wekili namzatliqigha tizimlitish aldida turghan ikki kishi saqchilar teripidin sewebsiz tutup ekitilip purset ötkiche solap qoyulghan.

Melum bolushiche, chungchingdiki yüjung rayonida xelq wekillikige namzatliqqa tizimlitish 18-noyabir bashlan'ghan we 22-noyabir chüshtin kéyin sa'et 5 te axirlashqan. Mezkur tewelikte özlirini musteqil namzatliqqa körsetmekchi bolghan xen lyang we shiy den isimlik ikki kishi, biri saqchilar teripidin, yene biri namelum kishiler teripidin baghlap ekitilip 3 kün'giche chet bir jaydiki namelum orun'gha solap qoyulghan we namzat tizimlash waqti axirlashqanda qoyup bérilgen.

Mezkur ikki shexsning radiyomizgha ashkarilishiche, ular bügün chungching sheherlik xelq qurultiyigha bérip ehwalni melum qilghan we özlirini bu pursettin mehrum qaldurghan saqchi we namelum kishiler üstidin tekshürüsh élip bérishni telep qilghan. Xewerlerde bayan qilinishiche, bu xil ehwallar mushu bir hepte ichide xitayning béyjing we shangxey qatarliq jayliridimu yüz bergen. Da'iriler saylamda idare-organlar teripidin teyinlen'gen namzatlarni tizimlap, musteqil namzatlarning özini tizimlitishini her xil usulda chekligen.

Xitay asasiy qanunida 18 yashqa toshqan herqandaq puqraning saylash-saylinish hoquqi barliqi dölet qurulghandila belgilen'gen bolsimu, da'irilerning eng töwen qatlamdiki musteqil namzatlardinmu chöchüshi közetküchilerning diqqitini tartmaqta.