Amérika xelq'ara diniy erkinlik komitéti amérika hökümitini Uyghur mesilisini soda söhbiti bilen birleshtürüshke chaqirdi

Muxbirimiz erkin
2019-05-10
Élxet
Pikir
Share
Print

Amérika xelq'ara diniy erkinlik komitéti 10‏-may bayanat élan qilip, amérika hökümitini Uyghurlarni öz ichige alghan diniy erkinlik we kishilik hoquq mesilisini xitay bilen ötküzüwatqan soda söhbiti bilen birleshtürüshke chaqirghan.

Bayanatta tramp hökümitining xitayda diniy jama'etlerning jazalashqa uchrawatqanliq mesilisini washin'gtonda ziyarette boluwatqan xitayning mu'awin bash ministiri lyu xé bilen sözlishishi telep qilin'ghan. Bayanatta yene amérika dölet mudapiye ministirliqining sözi neqil keltürülüp, "Xitay hökümitining shinjangdiki Uyghur we bashqa musulmanlardin 3 milyondek kishini tutqun qilghanliqi" ni tekitlen'gen. Bu, amérika dölet mudapiye ministirliqidin kéyin xitayning 3 milyondek Uyghurni lagérlargha qamighanliqini tilgha alghan ikkinchi bir amérika hökümet organidur.

Amérika dölet mudapiye ministirliqining yardemchi ministiri rendi shraywér yéqinda xitayning 3 milyondek Uyghur we bashqa türkiy tilliq musulmanlarni "Yighiwélish lagérliri" gha qamighanliqini ilgiri sürgen. Bu xelq'ara taratqularda zor ghulghula qozghighan idi.

Bayanatta yene mezkur komitétning komissari geriy be'ér "Nöwette xitay kommunist hökümitining élip bériwatqan barliq dinlarni xitaychilashturush herikiti, bügünki künde yüz bériwatqan diniy erkinlikni eng éghir depsende qilish hadisisi"" ikenlikini tekitligen. U mundaq dégen: "Xitay bilen bolghan soda munasiwiti heqqidiki bu qétimqi söhbette dinlarning basturulushi we kishilik hoquq mesilisi söhbet küntertipige élinishi kérek. Bu meyli musulman, meyli buddist, meyli xrisiyan yaki falun'gong muritliri bolsun, her bir er we her bir ayalining özi xalighan shekilde ibadet qilishtin ibaret heq-hoquq mesilisidur. Xitaydiki milyonlighan xelqning hayati we erkinliki öz hökümitining hujumigha uchrawatqan ehwalda biz diniy erkinlik we kishilik hoquqni uning küntertipige élip kirishimiz kérek."

Amérika xelq'ara diniy erkinlik komitéti ötken hepte élan qilghan yilliq doklatida amérika hökümitige xitayni "Diniy erkinliki alahide közitilidighan döletler tizimliki" ge kirgüzüshni, shuningdek chén chüen'go qatarliq xitay emeldarlirigha jaza qoyushni teklip qilghan idi.

Toluq bet