Хәлқара кәчүрүм тәшкилати хитайдин ғайиб қазақ аилисиниң ақивити һәққидә учур беришни тәләп қилди

Мухбиримиз әркин
2021-01-22
Share

Хәлқара кәчүрүм тәшкилати 22-январ җиддий чақириқ елан қилип, хитай даирилиридин уйғур елидә 2020-йили 8-айдин бери из-дерики болмиған қазақ аилисиниң ақивитидин учур беришни тәләп қилған. Чақириқнамидә ейтилишичә, уйғур аптоном райониниң или областидин болған вәйлина мухатай вә униң моһеят хәлиюлла, парисат һәлиюлла исимлик икки оғлиниң 2020-йили 8-айдин бери из-дерики йоқ икән. Бу аилидики 4 киши 2018-йили 3-айда лагерға елип кетилгән болуп, вәйлина вә униң икки оғли 2019-йили қоюп берилгән, бирақ уларниң дадиси һәлиюлла турсун 2020-йили 12-айда лагерда өлүп кәткән.

Хәлқара кәчүрүм тәшкилатиниң ейтишичә, уларниң бир оғли қазақистанда болуп, униң 2020-йили 8-айдин бери аниси вә икки қериндиши билән болған алақиси үзүлгән. Хәлқара кәчүрүм тәшкилати, кишиләрни или областлиқ җамаәт хәвпсизлик идарисиниң башлиқи гав чиға хәт йезип, вәйлина мухатай вә униң оғуллирини қоюп беришни, әгәр улар хәлқара бирдәк етирап қилған бирәр қанунға хилаплиқ садир қилған болса, уларниң хәлқара өлчәмләр бойичә адил сотлинишиға капаләтлик қилишни тәләп қилишқа чақирған.

Хитай һөкүмити 2016-йилдин кейин қазақларға тутқан сияситини өзгәртип, уларниму кәң көләмдә тутқун қилған. Буниң билән бәзи қазақлар қазақистанға қечип чиқип панаһлиқ тиләшкә башлиғаниди. Бирақ фирансийә агентлиқиниң хәвәр қилишичә, өткән йили қазақистанға қечип чиқип панаһлиқ тилигән қазақлардин қайша ақан исимлик аял билән мурагәр алимоли исимлик яш, 21-январ қазақистанниң алма-ата вә нурсултан шәһәрлиридә һуҗумға учриған. Хәвәрдә мурагер алимоғлиниң әһвали еғир икәнликини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт