Xelq'ara kechürüm teshkilati xitaydin ghayib qazaq a'ilisining aqiwiti heqqide uchur bérishni telep qildi

Muxbirimiz erkin
2021-01-22
Share

Xelq'ara kechürüm teshkilati 22-yanwar jiddiy chaqiriq élan qilip, xitay da'iriliridin Uyghur élide 2020-yili 8-aydin béri iz-dériki bolmighan qazaq a'ilisining aqiwitidin uchur bérishni telep qilghan. Chaqiriqnamide éytilishiche, Uyghur aptonom rayonining ili oblastidin bolghan weylina muxatay we uning mohéyat xeliyulla, parisat heliyulla isimlik ikki oghlining 2020-yili 8-aydin béri iz-dériki yoq iken. Bu a'ilidiki 4 kishi 2018-yili 3-ayda lagérgha élip kétilgen bolup, weylina we uning ikki oghli 2019-yili qoyup bérilgen, biraq ularning dadisi heliyulla tursun 2020-yili 12-ayda lagérda ölüp ketken.

Xelq'ara kechürüm teshkilatining éytishiche, ularning bir oghli qazaqistanda bolup, uning 2020-yili 8-aydin béri anisi we ikki qérindishi bilen bolghan alaqisi üzülgen. Xelq'ara kechürüm teshkilati, kishilerni ili oblastliq jama'et xewpsizlik idarisining bashliqi gaw chigha xet yézip, weylina muxatay we uning oghullirini qoyup bérishni, eger ular xelq'ara birdek étirap qilghan birer qanun'gha xilapliq sadir qilghan bolsa, ularning xelq'ara ölchemler boyiche adil sotlinishigha kapaletlik qilishni telep qilishqa chaqirghan.

Xitay hökümiti 2016-yildin kéyin qazaqlargha tutqan siyasitini özgertip, ularnimu keng kölemde tutqun qilghan. Buning bilen bezi qazaqlar qazaqistan'gha qéchip chiqip panahliq tileshke bashlighanidi. Biraq firansiye agéntliqining xewer qilishiche, ötken yili qazaqistan'gha qéchip chiqip panahliq tiligen qazaqlardin qaysha aqan isimlik ayal bilen murager alimoli isimlik yash, 21-yanwar qazaqistanning alma-ata we nursultan sheherliride hujumgha uchrighan. Xewerde muragér alimoghlining ehwali éghir ikenlikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet