Хәлқара кәчүрүм тәшкилатиниң йеңи ишхана иҗаригә елиши хитайниң тосқунлуқ қилишиға учриған

Мухбиримиз ирадә
2019-05-14
Елхәт
Пикир
Share
Принт

Хитай һөкүмитиниң уйғур елидә йолға қойған йепиқ тәрбийә лагерлирини әйибләш вә бу лагерларға соланған бир қисим тутқунларни сүрүштә қилишта актип рол ойнаватқан хәлқара кәчүрүм тәшкилатиниң америкадики шөбисиниң билдүрүшичә, хитай һөкүмити уларниң ню-йорктики бир бинадин ишхана иҗаригә елишиға тосқунлуқ қилған.

«Ню-йорк вақти» гезитиниң хәвиридин қариғанда, мәзкур тәшкилат ню-йорктики бир бинадин йеңи ишхана иҗарә алмақчи болған. Бирақ һәммә рәсмийәтләр пүтүп келишимни имзалайдиған басқучқа кәлгәндә иҗарә бәргүчи ширкәт келишимдин йенивалған. Иҗарә бәргүчи ширкәтниң изаһлишичә, «бу бина хитай дөләт игидарчилиқидики коско транспорт ширкитигә тәвә болуп, мәзкур хитай ширкити бинада өз дөлитигә қарши гәп қилидиған бир органниң болушини мувапиқ әмәс» дәп йолйоруқ бәргән икән.

Коско транспорт ширкити хитайниң әң зор дөләт карханилириниң бири болуп, у мәркизи һөкүмәткә биваситә қарайдиған 100 карханиниң бири һесаблинидикән.

«Ню-йорк вақти» гезити бу һәқтики хәвиридә, мәркизи әнгилйәдики хәлқара кәчүрүм тәшкилатиниң уйғурлар учраватқан зулумға вә шундақла уйғур диярида йолға қоюлуватқан лагерға қарши әң актип аваз чиқириватқан тәшкилатларниң бири икәнликини, хитай һөкүмитиниң мәзкур тәшкилатниң районға берип лагерларни биваситә тәкшүрүш тәлипини рәт қилғанлиқини тәкитләп өткән.

Хәлқара кәчүрүм тәшкилатиниң америка шөбиси техи бу йил 2-айда өзиниң икки милйондин ошуқ әзаси вә қоллиғучилирини һәрикәткә кәлтүрүш арқилиқ америка дөләт мәҗлисидә оттуриға қоюлған уйғурларға мунасивәтлик икки қанун лайиһәсини қоллашни қарар қилған. Улар бу һәқтә елан қилған баянатида, америка дөләт мәҗлис әзалирини «һазирқи бу ачқучлуқ кишилик һоқуқ мәсилисини һәл қилиш үчүн икки қанун лайиһәсини қилчиму иккиләнмәй туруп мақуллаш» қа чақирған.

Улар, техи алдинқи күни, йәни 13-май күни, малайсиядин ғулҗиға қайтқандин кейин тутуп кетилип лагерға соланған уйғур доктор аспиранти гүлгинә ташмуһәммәт һәққидә «җиддий һәрикәт» чақириқи елан қилип, хитай һөкүмитидин уни дәрһал қоюветишни, гүлгинә үстидики барлиқ әйибләшләрни бикар қилип, униң ақивитини ашкарилашни тәләп қилғаниди.

Пикирләр (0)
Share
Толуқ бәт