Xelq'ara kechürüm teshkilatining yéngi ishxana ijarige élishi xitayning tosqunluq qilishigha uchrighan

Muxbirimiz irade
2019-05-14
Élxet
Pikir
Share
Print

Xitay hökümitining Uyghur élide yolgha qoyghan yépiq terbiye lagérlirini eyiblesh we bu lagérlargha solan'ghan bir qisim tutqunlarni sürüshte qilishta aktip rol oynawatqan xelq'ara kechürüm teshkilatining amérikadiki shöbisining bildürüshiche, xitay hökümiti ularning nyu-yorktiki bir binadin ishxana ijarige élishigha tosqunluq qilghan.

"Nyu-york waqti" gézitining xewiridin qarighanda, mezkur teshkilat nyu-yorktiki bir binadin yéngi ishxana ijare almaqchi bolghan. Biraq hemme resmiyetler pütüp kélishimni imzalaydighan basquchqa kelgende ijare bergüchi shirket kélishimdin yéniwalghan. Ijare bergüchi shirketning izahlishiche, "Bu bina xitay dölet igidarchiliqidiki kosko transport shirkitige tewe bolup, mezkur xitay shirkiti binada öz dölitige qarshi gep qilidighan bir organning bolushini muwapiq emes" dep yolyoruq bergen iken.

Kosko transport shirkiti xitayning eng zor dölet karxanilirining biri bolup, u merkizi hökümetke biwasite qaraydighan 100 karxanining biri hésablinidiken.

"Nyu-york waqti" géziti bu heqtiki xewiride, merkizi en'gilyediki xelq'ara kechürüm teshkilatining Uyghurlar uchrawatqan zulumgha we shundaqla Uyghur diyarida yolgha qoyuluwatqan lagérgha qarshi eng aktip awaz chiqiriwatqan teshkilatlarning biri ikenlikini, xitay hökümitining mezkur teshkilatning rayon'gha bérip lagérlarni biwasite tekshürüsh telipini ret qilghanliqini tekitlep ötken.

Xelq'ara kechürüm teshkilatining amérika shöbisi téxi bu yil 2-ayda özining ikki milyondin oshuq ezasi we qollighuchilirini heriketke keltürüsh arqiliq amérika dölet mejliside otturigha qoyulghan Uyghurlargha munasiwetlik ikki qanun layihesini qollashni qarar qilghan. Ular bu heqte élan qilghan bayanatida, amérika dölet mejlis ezalirini "Hazirqi bu achquchluq kishilik hoquq mesilisini hel qilish üchün ikki qanun layihesini qilchimu ikkilenmey turup maqullash" qa chaqirghan.

Ular, téxi aldinqi küni, yeni 13-may küni, malaysiyadin ghuljigha qaytqandin kéyin tutup kétilip lagérgha solan'ghan Uyghur doktor aspiranti gülgine tashmuhemmet heqqide "Jiddiy heriket" chaqiriqi élan qilip, xitay hökümitidin uni derhal qoyuwétishni, gülgine üstidiki barliq eyibleshlerni bikar qilip, uning aqiwitini ashkarilashni telep qilghanidi.

Toluq bet