Xelq'ara kechürüm teshkilati yene bir Uyghur heqqide qoyup bérishni telep qilish herikiti bashlidi

Muxbirimiz erkin
2020-05-22
Share

Xelq'ara kechürüm teshkilati 22-may küni awstraliyediki ata-anisigha pul salghanliqi seweblik tutqun qilin'ghan yene bir Uyghur tutquni heqqide qoyup bérishni telep qilish herikiti bashlidi.

Bu mezkur teshkilatning yéqinqi bir qanche hepte ichide qoyup bérishni telep qilish herikiti bashlighan 4-Uyghur tutqunidur. Mezkur teshkilatining chaqiriqida tekitlishiche, bu qétim ular ghuljadiki ayal tutqun mahire yaqupni qoyup bérishni telep qilghan. Mahire yaqup ghuljadiki bir sughurta shirkitining xadimi bolup, 2019-yili 3-ayda tutqun qilin'ghan.

Uning tutqun qilinishigha uning 2013-yili awstraliyediki ata-anisigha ularning öy sétiwélishi üchün pul sélishi seweb bolghan. Xelq'ara kechürüm teshkilatining bildürüshiche, mahire yaqup bu yil 1-ayda hammisi gülbehrem memtimin we taghisi qasim toxti bilen birge "Térrorluq heriketlirige maddiy yardem qilish" bilen eyiblinip sotlan'ghan. Uning hammisi bilen taghisi képilge qoyup bérilgen bolsimu, lékin mahire yaqupning ehwali qattiq endishe qozghimaqta iken.

Mezkur teshkilat chaqiriqida kishilerni ili oblastliq teptish mehkimisining mu'awin teptishi xen jyélonggha xet yézip, mahire yaqupni qoyup bérishni, ulargha qaritilghan eyibleshni bikar qilishni, mahire yaqupning a'ilisi bilen uchrishishi, dawalinishi, adwokat teklip qilishi hemde özining qiyin-qistaq we qopal mu'amilige uchrimasliqigha kapaletlik qilishni telep qilishqa chaqirghan. Xelq'ara kechürüm teshkilati buning aldida shinjang uniwérsitétitining sabiq mudiri tashpolat téyip, shinjang islam institutining oqutquchisi iminjan seydin, "Baghdash" torining qurghuchisi ekper esetni qoyup bérishni telep qilish herkiti bashlighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet