Xelq'ara kechürüm teshkilati: "Doxtur gülshen abbasning salametlik ehwali jiddiy endishe qozghimaqta"

Muxbirimiz erkin
2020-06-05
Élxet
Pikir
Share
Print

Xelq'ara kechürüm teshkilati jiddiy chaqiriq élan qilip, ghayib Uyghur doxturi gülshen abbasning salametlik ehwalidin jiddiy endishe qiliniwatqanliqi, uning derhal qoyup bérilishini telep qildi. Mezkur teshkilat ötken hepte élan qilghan chaqiriqida, kishilerni uning hazirqi ehwali we qeyerde ikenlikini ashkarilashni telep qilip, ürümchi sheherlik jama'et xewpsizlik idarisining bashliqi taw xongjün'ge xet yézishqa chaqirghan.

Chaqiriqnamide tekitlinishiche, 2018-yili 10-séntebirdin béri iz-déreksiz ghayib bolghan doxtur gülshen abbasning qan bésim, bel we bash aghriqi qatarliq qerellik tekshürtüp turushi we dawalinishi kérek bolghan asta xaraktérlik késellikliri bar bolup, bu uning salametlik ehwaligha qarita jiddiy endishe peyda qilmaqtiken. Gülshen abbas ürümchidiki néfit-ximiye doxturxanisining pénsiyege chiqqan doxturi bolup, 2018-yili 10-séntebirdin bashlap ghayib bolghan.

Gülshen abbasning ghayib bolushi uning amérikadiki singlisi roshen abbasning kishilik hoquq pa'aliyiti bilen munasiwetlik, dep qarilip, xelq'ara taratqularning diqqitini qozghighanidi. Xelq'ara kechürüm teshkilatining bildürüshiche, xitay da'iriliri hazirgha qeder uning a'ilisidikilerge uning qeyerde ikenliki heqqide resmiy uchur bermigen. Lékin, uning a'ilisidikiler gülshen abbasning "Qayta-terbiyelesh lagéri" gha élip kétilgenlikige ishinidiken.

Xelq'ara kechürüm teshkilati xitay da'iriliridin gülshen abbasni qoyup bérishni, u qoyup bérilgiche uning qeyerde ikenlikini ashkarilishi, a'ilisi bilen körüshtürüshi, adwokat tutushi we muwapiq dawalashqa érishishige yol qoyushi, uning ten jazasi we her xil qopal mu'amilige uchrimasliqigha kapaletlik qilishini telep qilishqa chaqirghan.

Toluq bet