“Xelq'ara kishilik hoquq xizmiti teshkilati” xitayni Uyghur mesilisi boyiche jawabkarliqqa tartishta yenimu ilgiriligen halda heriket qollinishqa chaqirdi

“Xelq'ara kishilik hoquq xizmiti teshkilati” 4-noyabir doklat élan qilip, xitayning Uyghur élidiki éghir kishilik hoquq depsendichilikini jawabkarliqqa tartishta qismen ilgirilesh bolghan bolsimu, emma téximu ilgiriligen halda heriket qollinishning zörürlükini bildürgen.

Doklatta qeyt qilinishiche, b d t kishilik hoquq aliy komissarining “Shinjang doklati” élan qilin'ghinigha ikki yil bolghan bolsimu, lékin dunya bu mesilige yenila küchlük rewishte diqqet qilmaqta iken. Doklatta, 15 gherb dölitining 22-öktebir küni awstraliye bashchiliqida tunji qétim b d t omumi kéngishige chaqiriq qilip, xitayni kishilik hoquq aliy komissarining “Shinjang doklati” diki tewsiyelerge emel qilishqa, jümlidin tibet we Uyghur élidiki barliq tutqunlarni qoyup bérishke chaqirghanliqi tekitlen'gen.

Doklatta qeyt qilinishiche, xitayning “Shinjang doklati” ni ret qilishi, uning islam hemkarliq teshkilati, afriqa döletliri, kuba, pakistan, qazaqistan, qirghizistan qatarliq döletlerning qollishigha érishishi, döletlerning “Qosh ölchem” qollinishi we uniwérsal kishilik hoquqqa emel qilmasliqi epsuslinarliq ish bolsimu, emma “Shinjang doklati” yenila b d t da xitay toghrisidiki kishilik hoquq munazirilirining merkizi nuqtisi bolmaqta iken.

Doklatta mundaq déyilgen: “Xelq'ara jem'iyet xitaygha mejburiyitini ada qilish heqqide dawamliq bésim qilip, uning chégrasi ichidiki barliq kishilerning kishilik hoquqini qoghdishigha kapaletlik qilishi kérek. ” doklatta, xelq'ara kishilik hoquq xizmiti teshkilati xitay hökümitining b d t kishilik hoquq aliy komissari ishxanisining “Shinjang doklati” we bashqa b d t kishilik hoquq méxanizmlirining tewsiyelirini emeliyleshtürüshi, b d t kishilik hoquq kéngishining xitayni nazaret qilish méxanizmi qurushini telep qilghan. Shuning bilen bir waqitta yene b d t kishilik hoquq aliy komissarining xitayning kishilik hoquq weziyitini, jümlidin Uyghur élining weziyitini dawamliq közitishi, “Shinjang doklati” ning ijra qilinish ehwalidin ashkara melumat bérip turushini chaqirghan. Bu chaqiriq, xitay dunyada “Shinjangning ijabiy obrazi” ni tiklesh üchün mislisiz tüste teshwiqat hujumi qozghighan bir peytte otturigha qoyulghan.