Хәлқаралиқ чоң ширкәтләр хитай иқтисадиниң пат йеқинда әслигә кәлмәйдиғанлиқини билдүрүшкән

“ройтерс агентлиқи” ниң 7-февралдики хәвиридә дейилишичә, явропадики даңлиқ марка ширкәтлири хитай иқтисадиниң тез әслигә кәлмәйдиғанлиқини мөлчәрлимәктикән.

Данийәниң пива маркиси болған карлсберг (CARLb.CO) Ниң баш иҗраийә әмәлдари җакоб аруп-андерсениң “ройтерс агентлиқи” ға ейтишичә, бу пива ширкитиниң әң чоң базири болған хитайдики сетиш көлими бултур 5 пирсәнт әтрапида төвәнлигән болуп, бу төвәнләшниң бу йилму давамлишидиғанлиқи пәрәз қилинмақтикән. У сөзидә “биз хитай иқтисадида көрүнәрлик өзгириш болиду, дәп қаримаймиз. Бундақ дейишкә техи балдур” дегән.

Хәвәрдә дейилишичә, хитай иқтисадидики чекиниш, яшлардики ишсизлиқ, өй-мүлүк киризиси қатарлиқлар истемал тәлипиниң көрүнәрлик төвәнлишигә сәвәб болған. Хәлқаралиқ ширкәтләр буниң үстигә америка пирезиденти доналд трампниң хитайға қойған таможна беҗи вә сода җазаси тәдбирлириниң тәсирини қошқанда, хитай базириниң алдирап әслигә кәлмәйдиғанлиқиға ишинидикән.

Хәвәрдә дейилишичә, һәр хил марка ширкәтлири хитайниң чаған байрими мунасивити билән истемалда ешиш болуши мумкинликини үмид қилған болсиму, бирақ фирансийәниң пернод рикард (PERP.PA) Намлиқ үзүм һариқи ширкити “дәсләпки аламәтләр бу байрамниңму сетишларниң артишиға бәк пайдиси болмиғанлиқини көрситип бәрди” дегән.

Мәзкур ширкәтниң билдүрүшичә, уларниң хитайдики сетилиш миқдари алдинқи йерим йилда %25 төвәнлигән болса, америкида%7 төвәнлигән икән.

Даңлиқ гирим буюмлири магнати L'Oreal (OREP.PA) Болса хитайдики сетиш рәқәмлиригә аит доклатни алдимиздики һәптә елан қилидикән. Канаданиң даңлиқ ғаз пейи билән ясалған қишлиқ кийим маркиси гус (GOOS.TO) Му охшашла хитайдики сетишлириниң мөлчәрдики пәсиллик киримдин чүшүп кәткәнликини билдүргән.

Ройтерсниң дейишичә, шакилаттин чиш пастисиғичә болған барлиқ ширкәтләрниң башқурғучилири өткән һәптидә чақирилған төтинчи пәсиллик кирим музакирә йиғинида, хитайниң иқтисадиниң қисқа муддәттә әслигә келишиниң еһтималдин йирақлиқини билдүргән болуп, бу юқиридики ширкәтләрниң имканийәтлирини башқа яқларға буриши мумкинликидин дерәк беридикән.