Хәлқара җинайи ишлар соти уйғурларниң ирқий қирғинчилиқ әрзини қобул қилишни рәт қилған

Мухбиримиз әркин
2020-12-14
Share

Хәлқара җинайи ишлар сотиниң тәптиш әмәлдарлири уйғурларниң хитай һөкүмити үстидин сунған уйғурларға қарита "ирқий қирғинчилиқ" вә "инсанийәткә қарши җинайәт" садир қилғанлиқини тәкшүрүш һәққидики әрзини қобул қилишни рәт қилған.

Фирансийә агентлиқиниң хәвәр қилишичә, хәлқара җинайи ишлар сотиниң баш тәптиш ишханиси 14-декабир әрзнаминиң қобул қилинмиғанлиқини билдүргән. "шәрқий түркистан сүргүндики һөкүмити" дәп аталған орун бу 7-айда хәлқара җинайи ишлар сотиға әрз қилип, хитайниң милйонлиған уйғур вә башқа мусулманларни җаза лагерлириға қамиғанлиқи, аялларға қарита мәҗбурий туғмас қилиш елип барғанлиқиға даир зор миқдарда дәлилләрни сунған.

Лекин фирансийә агентлиқиниң йезишичә, тәптиш әмәлдари фатов бансоданиң ишханиси әрзгә қарита һәрикәт қолланмиғанлиқи, "чүнки әрздики қилмишларниң хитай земинида йүз бәргәнлики", "хитайниң мәркизи гаагадики хәлқара җинайи ишлар сотиға имза қойған дөләт әмәслики" ни билдүргән. Бансоданиң ишханиси йиллиқ доклатида: "әрзнамидики көп қисим җинайәт сотниң һоқуқини йүргүзүшидики территорийәлик алдинқи шәрткә чүшмәйдиғанлиқи" илгири сүрүлгән.

Униңда қәйт қилинишичә, уйғурларниң таҗикистан вә камбоджадин хитайға қайтурулғанлиқиға даир айрим тәләпләрму "бу әрзини қобул қилишқа асас болалмайдикән". Лекин, хәлқара җинайи ишлар соти доклатида йәнә уйғур әрздарлириниң адвокатлириниң сот мәһкимисидин униң "йеңи дәлил-испатлар асасида қарарини қайта ойлишиши" ни тәләп қилғанлиқини билдүргән. Хәлқара җинайи ишлар сотиниң қарари хәлқарада хитайниң уйғурларға тутқан муамилиси "ирқий қирғинчилиқ" дегән қараш барғансери күчийиватқан бир вақитта чиқирилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт