С н н мухбири мәт риверс уйғурларниң вәзийитини «йәршаридики әң зор кишилик һоқуқ мәсилисиниң бири» дәп тәсвирлиди

Мухбиримиз ирадә
2019-05-09
Елхәт
Пикир
Share
Принт

Американиң нопузлуқ телевизийә қаналлиридин болған с н н ниң мухбирлири йеқинда уйғур елидики йепиқ тәрбийә лагерлирини тәкшүрүш үчүн уйғур елиға барған иди. Улар 7-май күни бу һәқтә тарқатқан хәвиридә 2017-йили қазақистандин или областиниң толи наһийисигә туғқан йоқлаш үчүн кәткән пети из-дерики болмиған әдибә исимлик аялниң лагерға қамалған болуши мумкинликини билдүргән вә лагерларниң йирақтин тартилған көрүнүшлирини көрсәткән иди.

С н н теливизийәсиниң 8-май бу һәқтә тарқатқан йәнә бир хәвиридә баян қилинишичә, хитай даирилири с н н телевизийәсиниң алдинқи күнидики хәвириниң хитайдики телевизорларда көрүнүшигә тосқунлуқ қилған. Йәни, с н н ниң хәвәр программиси дәл мушу уйғур елидики лагерлар қисмиға кәлгәндә екран туюқсизла қап-қараңғу болуп кәткән. Хәвәр өтүп кәткәндин кейин андин екран әслигә кәлтүрүлгән. 

Мәзкур хәвәрдә с н н мухбири мәт риверс өзиниң уйғур елидики зиярити давамида бешиға кәлгән қийинчилиқларни техиму тәпсилий баян қилған. Риверсниң баян қилишичә, у өзиниң 6 күнлүк зиярити давамида аз дегәндә 50 қетим паспорт вә виза тәкшүрүшидин өткүзүлгән. Нәгила барса пуқрачә кийингән сақчилар кәйнигә киривалған, һәрқандақ йәргә йетип бериштин бурунла уни күтүп турған сақчи вә дөләт кадирлирини көргән. Улар һәтта йерим кечидә у чүшкән меһманханиға келип униң материяллирини тәкшүргән. 

Юқириқи с н н мухбири сөзидә хитай даирилириниң мухбирларниң өзлири йошуруватқан нәрсиләрни көрүп қалмаслиқи үчүн барлиқ амалларни ишқа салғанлиқини баян қилиду. У сөзидә «хитай һөкүмити давамлиқ шинҗаң дегән һәммигә очуқ җай, зиярәт қилсаңла болиду, дәйду. Бирақ әмәлийәт буниң дәл әкси» дегән. У сөзидә йәнә уйғур елидики вәзийәтниң һазир дунядики әң чоң кишилик һоқуқ мәсилиси икәнликини, әмма хитай һөкүмитиниң мухбирларға қаттиқ тосқунлуқ қилғанлиқтин дуняниң әмәлийәттин хәвәрсиз қеливатқанлиқини әскәртиду вә «биз биваситә шаһит болғандәк, хитай буни пүтүн күчи билән йошуруватиду» дәйду.

Пикирләр (0)
Share
Толуқ бәт