Уйғур районидин пахта тоқумичилиқ мәһсулатлирини сетивелишни тохтатқан хәлқара ширкәтләр көпәйгән

Мухбиримиз әркин
2019-11-13
Share

Уйғур районидики кишилик һоқуқ дәпсәндичилики вә мәҗбури әмгәк сәвәблик райондики хитай карханилириниң пахта тоқумичилиқ мәһсулатлирини сетивелишни тохтатқан хәлқара ширкәтләрниң көпийиватқанлиқи илгири сүрүлди. BBC Ниң хәвәр қилишичә, нөвәттә адидас, еспирит H&M қатарлиқ даңлиқ хәлқара ширкәтләр уйғур райониға четишлиқ пахта тоқумичилиқ мәһсулатлирини сетивелишни тохтатқан. Йеқинда японийәниң муҗи, уникло, намлиқ икки даңлиқ кийим-кечәк ширкитиниң уйғур районида ишләпчиқирилған пахта тоқумичилиқ мәһсулатлирини реклам, йәни елан-сәнәт қилип тонуштурған. Бу икки ширкәтниң хитай һөкүмити лагерлардики 2 милйондәк уйғур, қазақ вә башқа мусулман тутқунлириниң бир қисмини, шундақла тутқунларниң аилә әзалирини райондики хитай пахта тоқумичилиқ карханилирида мәҗбури әмгәккә селип, хәлқара әмгәк вә кишилик һоқуқ өлчәмлиригә еғир хилаплиқ қилиш билән әйиблиниватқан бир мәзгилдә бу рекламни чиқириши кишилик һоқуқ тәшкилатлириниң қаттиқ тәнқидигә учриғаниди.

BBC Ниң хәвиридә қәйт қилинишичә, хәлқара бесим техиму көп хәлқара ширкәтләрни уйғур райони билән болған содида техиму еһтиятчан болушқа мәҗбурлимақта икән. Адидас ширкити BBC ға бәргән баянатида, өзлириниң райондики хуафу кийим-кечәк ширкити вә шуниңға охшаш карханилар билән һечқандақ тохтиму йоқлиқи, әмма өзлириниң «нөвәттә бу мәсилини тәкшүриватқанлиқи» ни билдүргән. 

Адидас ширкитиниң баянатчиси «биз бизни материал билән тәминлигүчи ширкәтләргә бизниң тәкшүрүшимиз ахирлашқичә хуафу ширкитиниң мәһсулатлирини закас қилмаслиққа буйридуқ» дегән. 

Хитайниң ақсудики «хуафу кийим-кечәк ширкити» даңлиқ хәлқара ширкәтләрни мәһсулат билән тәминләп келиватқан карханиларниң бири болуп, мәзкур кархана лагердики тутқунларни мәҗбури әмгәккә селиш билән әйиблинип кәлгәниди. Б б с ниң хәвиридә қәйт қилинишичә, еспирит ширкитиму өзлирини материял билән тәмингүчи карханиларға хуафу ширкитиниң мәһсулатлирини ишләтмәслик һәққидә буйруқ чүшүргәнликини билдүргән. Һалбуки, американиң H&M ширкити өзлириниң уйғур районидики һечқандақ бир кархана билән алақиси йоқлиқини илгири сүргән. Мәзкур ширкәтниң билдүрүшичә, улар хуафуниң ичкиридики бир карханиси билән васитилиқ сода алақиси қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт