Хитай әнгилийә университетлирида пикир вә академийә әркинликини чәкләш үчүн һәрикәт қилған

Мухбиримиз ирадә
2019-11-07
Елхәт
Пикир
Share
Принт

Хитай һөкүмитиниң әнгилийәдики университетларниң академийә вә пикир әркинликигә зор тәсир көрситиватқанлиқи мәлум болмақта.

Әнгилийәдә чиқидиған «муһапизәтчи» гезитиниң хәвәр қилишичә, йеқинда әнгилийәниң ташқий ишлар комитети бу һәқтә мәхсус бир доклат тәйярлап, хитай һөкүмитиниң әнгилийәдә турушлуқ әлчиханиси арқилиқ әнгилийәдики университитларда тәсир көрситиш һәрикити йүргүзгәнлики һәққидә җиддий испатлар барлиқини билдүргән. 

Улар йәнә хитай әлчиханиси билән һәрқайси университетлардики куңзи иниститутлири вә шундақла хитай оқуғучилар уюшмиси яки хитай тәтқиқатчилар уюшмиси қатарлиқларни сиясий қорал сүпитидә қоллинип, әнгилийә университетлирида тәйвән мәсилиси қатарлиқ сәзгүр темиларниң муназирә қилиниши вә шундақла хитай һөкүмитигә қарши пикирләрниң оттуриға чиқишиниң алдини алған. 

Мәлум болушичә, юқириқи органниң доклатида йәнә хитай һөкүмитиниң юқириқи органлири арқилиқ әнгилийәдики университетта оқуйдиған айшигүл нурибраһим исимлик уйғур қизни назарәткә алғанлиқи вә униң юртидики аилисигә бесим ишләткәнликиму тилға елинған. 

Әнгилийә ташқий ишлар комитетиниң доклатида әскәртилишичә, «әнглийә һөкүмити гәрчә университетларни әқлий мүлүк оғрилиқидин қоғдашқа күч чиқарған болсиму, бирақ бу академийә әркинликини иқтисадий, сиясий вә депломатик бесимлар арқилиқ қилиниватқан тәсир көрситиш һәрикитидин қоғдап қелишқа йәтмигән». 

Юқириқи орган доклатида әскәртип «университетларниң оқуғучи қобул қилип пул тепиш вә тиҗарәт келишимлири бәдилигә әнгилийәгә вә шундақла дуняға әркинлик вә баяшатлиқ елип кәлгән хәлқаралиқ өлчәмләрни бир чәткә қайрип қойса болмайду,» дегән. 

Хәвәрдә ейтилишичә, юқириқи бу «ташқи ишлар комитети» йәнә әнгилийәниң ташқий ишлар министирлиқидин немишқа һазирғичә хитай һөкүмитиниң хоңкоң вә уйғур елида йүргүзиватқан бесим сиясәтлиригә қарши җаза тәдбирлири алмиғанлиқи һәққидә чүшәнчә беришни тәләп қилған.

Пикирләр (0)
Share
Толуқ бәт