Вашингтон почтиси гезити: “ши җинпиң ишәнч кризисиға дуч кәлмәктә”

Мухбиримиз әркин
2019.08.05

3‏-Авғуст күни “вашингтон почтиси” гезитидә елан қилинған бир мақалидә, хитай рәиси ши җинпиңниң өзигә болған ишәнч кризисиға вә көп тәрәплимилик хирисқа дуч келиватқанлиқи илгири сүрүлгән. Мәзкур мақалә “вашингтон почтиси” гезитиниң бейҗиңда турушлуқ ишханисиниң мәсули анна фифилд тәрипидин қәләмгә елинған. Анна фифилдниң “үстүнлүк вә гуманхорлуқ: хитайниң ши җинпиңи ишәнч кризисиға дуч кәлмәктә” сәрләвһилик мақалисидә илгири сүрүлүшичә, нөвәттә ши җинпиң хитайниң иқтисади тәрәққияти астилаш мәсилисигә дуч келипла қалмай, америка билән болған сода уруши, уйғур мәсилисидә 3 милйондәк кишиниң “қайта-тәрбийәләш лагерлири” ға қамилишиға қарита ғәрбниң күнсери күчийиватқан тәнқиди, шундақла тәйвән мәсилиси вә хоңкоңда партлиған демократийә һәрикитигә тақабил туруш мәсилисигә дуч кәлмәктикән. Мақалидә, “буларниң һәммисиниң партийә баш секретари болған ши җинпиңниң һоқуқиға тәһдит пәйда қиливатқанлиқи” вә шундақла “изчил ташқи тәһдитләрдин әндишә қилип келиватқан партийиниң ичидә җиддийчилик яратқанлиқи” тәкитләнгән.

Мақалидә илгири сүрүлүшичә, ши җинпиң бу тәһдитләргә қарши партийә ичидики позитсийисини қаттиқлаштурған.

Мақалидә, мутәхәссисләрниң ши җинпиңниң бу хил урунушини униңдики ишәнчсизлик туйғуси пәйда қилған, дәп қарайдиғанлиқи билдүрүлгән. Мақалидә, америка брукиңис институтидики җонатан полак, җефрей байден қатарлиқ мутәхәссисләрниң “компартийәниң хитай ичидә, болупму шинҗаңдәк районда бастурушни изчил күчәйтиши”, “униңдики әндишә вә әнсизликни ипадиләйду. Бу һәргиз йәршари вә район характерлик лидерликни талишиватқан, өзигә ишәнчи бар бир хитайни намаян қилмайду” дәп көрсәткәнлики оттуриға қоюлған. Мақалидә қәйт қилинишичә, компартийә рәһбәрлиридики бу хил әнсизлик, уларниң трамп һөкүмити елан қилған сода урушини ноқул иқтисадий мәсилә, дәп қаримай, уни хитайни контрол қилишни мәқсәт қилған истратегийилик урунуш, дәп қаришиға сәвәб болмақтикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.