Xitay “Shinjang mehsulatliri” ni sétiwalmighan ikki amérika shirkitige resmiy tehdit salghan

Xitay soda ministirliqi amérikaning “Shinjang mehsulatliri” ni bayqut qilghan ikki dangliq kiyim-kéchek markisini xitayning “Soda qara tizimliki” ge kirgüzüsh bilen tehdit salghan.

Birleshme agéntliqining xewer qilishiche, xitay soda ministirliqi 23-séntebir amérikaning kalwin klayin we tomi xilfigér namliq ikki dangliq kiyim-kéchek markisigha qarashliq PVH shirkiti üstidin “Soda qa'idisi” ge xilapliq qilghan, dégen guman bilen tekshürüsh élip baridighanliqini élan qilghan. Xitay soda ministirliqi 23-séntebir özining organ torida élan qilghan bayanatida, bu qétimliq tekshürüsh bu shirketning “Shinjangda ishlepchiqirilghan mehsulat” lirini bayqut qilghan, dégen gumaniy seweblik élip bérilidighanliqi tekitlen'gen.

Halbuki, xitayning kalwin klayin we tomi xilfigérni tekshürüsh qarari, amérika “Uyghur mejburiy emgikining aldini élish qanuni” chiqirip, xitayning “Irqiy qirghinchiliq rayoni” déyiliwatqan Uyghur élidiki kishilik hoquq depsendichiliki hem mejburiy emgekke chétishliq “Shinjang mehsulatliri” ni chekligen bir peytte otturigha qoyulushi, diqqet qozghimaqta.

Birleshme agéntliqining bildürüshiche, xitay soda ministirliqining bayanatida, “Amérikaning PVH guruhi normal bazar soda pirinsiplirigha xilapliq qilish, shinjang paxtisi we bashqa mehsulatlirini asassiz we sewebsiz bayqut qilip, alaqidar xitay shirketlirining qanunluq hoquqi we menpe'etige ziyan sélish, xitayning igilik hoquqi, bixeterliki hem tereqqiyat menpe'etige xeter yetküzüsh gumani peyda qildi” déyilgen.

Halbuki, PVH özining shirket torida élan qilghan bayanatida, özining qandaq yerde soda qilmisun, qanun-tüzümlerge emel qilidighanliqi, jümlidin “Amérika hökümitining shinjang toghrisidiki siyasitige hörmet qilidighanliqi” ni éytqan. Birleshme agéntliqining bildürüshiche, eger PVH guruhi “Shinjang mehsulatliri” ni sétiwélishta kemsitish xaraktérlik ishlarda bolghan bolsa, xitay soda ministirliqigha 30 kün ichide chüshenche bérishi kérek iken.