Хитай “шинҗаң пахтиси” мәһсулатлирини сетишта ички базарға йүзләнгән

Американиң “шинҗаң пахтиси” мәһсулатларни қаттиқ чәклиши билән бу мәһсулатларни хәлқара базарға селиши қийинлашқан хитай, “шинҗаң пахтиси” мәһсулатлирини сетишта ички базириға йүзләнгән. Һалбуки, хитай пахта тоқумичилиқ саһәсидики шәхсләр хитай ички базириниң көлими кичик болмисиму, әмма хитайниң ички базири чәт әл херидарлириниң “шинҗаң пахтиси” дин ваз кечиши кәлтүрүп чиқарған бошлуқни толдурушта қийниливатқанлиқини ейтқан.

“җәнубий хитай әтигәнлик почтиси” гезитиниң хәвәр қилишичә, хитайдики бир лөңгә завутиниң хоҗайини нөвәттә америкалиқ херидарлириниң мәһсулатлириға заказ беришидин бәк үмид күтмәйдиғанлиқи, һазир ички базарға йүзләнгәнлики, һазирқи херидарлириниң көп қисминиң ички херидарлар икәнликини ейтқан. Униң қаришичә, бу әһвалда “шинҗаң мәһсулатлири” ни ишләпчиқириш униң үчүн мәсилә әмәс икән.

Хәвәрдә қәйт қилинишичә, америка һөкүмити “уйғур мәҗбурий әмгикиниң алдини елиш қануни” ни иҗра қилишқа башлап, уйғур елидә ишләпчиқирилған мәһсулатларни чәклигән икки йилдин артуқ вақиттин бери, хитайниң тоқумичилиқ вә кийим-кечәк базирида бошлуқ келип чиққан. Нөвәттә хитайдики тоқумичилик ширкәтлири вә кийим-кечәк ишләпчиқарғучилар буниңдин келип чиққан бошлуқни толдурушта қийналмақта икән. юқириқи хитай кархана хоҗайини “шинҗаңда чиқимимизниң йерими азайғини раст болсиму, әмма омумий пайдимиз бурунқидәк әмәс” дегән. Хитай һөкүмити американиң ембаргосиға қарши нурғун йәрлик етибар бериш сиясәтлирини чиқирип, хитай тоқумичилиқ карханилирини уйғур районида тутуп турушқа тиришиватқан болсиму, әмма юқириқи кархана хоҗайини мәһсулатлириға берилгән “заказниң бурунқидәк әмәслики” ни билдүргән.

Хитайниң һөкүмәт санлиқ мәлуматлиридин мәлум болушичә, нөвәттә хитайдики омумий пахта мәһсулатиниң 90 пирсәнти, дуня пахта тәминатиниң төттин бир қисми уйғур елидә ишләпчиқирилмақта икән.