Shöhret zakir shinjang uniwérsitétini ijtima'iy muqimliqqa hesse qoshushqa chaqirdi

Muxbirimiz ümidwar
2016.06.19


Uyghur aptonom rayonining re'isi shöhret zakir ötken hepte Uyghur rayonidiki eng chong we tarixi uzun “Shinjang uniwérsitéti”da tekshürüsh xizmitide bolup, uniwérsitét rehberliri bilen uchrishish ötküzgende bir qatar mesililer qatarida shinjang uniwérsitétini Uyghur aptonom rayonining ijtima'iy muqimliqi we uzun muddetlik eminliki üchün hesse qoshushqa chaqirdi.

Shinjang uniwérsitéti torining xewer qilishiche, shöhret zakirgha shinjang uniwérsitétining pexri mudiriliq salahiyiti bérilgen bolup, u 17 - iyun küni shinjang uniwérsitétida ötküzülgen mexsus murasimda pexri mektep mudiriliq kinishkisini tapshuruwalghan.

Shöhret zakir mektep rehberliri we oqutquchi - oqughuchilargha sözligen doklatida shinjang uniwérsitétining tiriship, “Gherbtiki ilghar, ottura asiyadiki birinchi derijilik, xelq'aragha tonulghan uniwérsitét”qa aylinish nishanini emelge ashurushi kéreklikini tekitligen.

Bolupmu u sözide oqutquchilarning özlirining söz - heriketliri arqiliq oqughuchilarni “Wetenning birlikini qoghdash we milletler ittipaqliqi hem ijtima'iy muqimliqni qoghdash ijrachiliri we bashlamchiliri” qilip terbiyilishini telep qilghan.

U yene “Bölgünchilikning singip kirishige qarshi mustehkem idiyiwi mudapi'e sépi” berpa qilishnimu tilgha alghan.

Tarixi melumatlardin qarighanda shinjang uniwérsitéti shinjang instituti namida 1935 - yili qurulghan bolup, 1960 - yili resmiy uniwérsitét bolghan. Ilgiri - axiri ablet abduréshit, isma'il tiliwaldi qatarliqlar mezkur uniwérsitétning pexriy mudiri bolghan bolup, bu qétim nöwet shöhret zakirgha kelgen.

Shinjang uniwérsitéti Uyghur ziyaliyliri eng köp jaylashqan ilim dergahi we Uyghur zamaniwi aliy ma'aripining muhim böshüki bolup, mezkur uniwérsitétning Uyghur oqughuchiliri, 1985 - yili 12 - dékabirda we 1988 - yili,6 - ayda keng kölemlik naraziliq namayish heriketliri élip barghan, 2009 - yilidiki 5 - iyul ürümchi namayishidimu mezkur uniwérsitét oqughuchilirining tesiri bolghanliqi éytilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.