Аталмиш “шинҗаң вәкилләр өмики” ниң гуруппа музакириси буниңдин кейинки вәзийәттин бешарәт бәрмәктә

• Мухбиримиз әзиз
  2019-03-06

Бейҗиңда ечиливатқан 13-нөвәтлик хәлқ қурултийиниң 2-омуми йиғиниға қатнишиватқан аталмиш “шинҗаң вәкилләр өмики” 5-март күни һөкүмәт хизмитидин берилгән доклатни мәхсус музакирә қилған. Шуниң билән биргә бу җәрянда буниңдин кейинки хизмәтниң омумий нишани һәққидә бәзи қарарлар елинған.

“тәңритағ тори” ниң 6-марттики хәвиридә ейтилишичә, хитай секретар чен чуәнго өмәк башлиқи болған мәзкур вәкилләр өмики өмәк йиғини ачқан. Чен чуәнго сөз қилип хитай баш министири ле кечяңниң һөкүмәт хизмити һәққидә бәргән доклатини толуқ қоллайдиғанлиқини, өзлириниң ши җинпиң башчилиқидики хитай рәһбәрлик қатлими бекитип бәргән сиясий принсип өлчими вә түплүк сиясий қаидиләрни қәтий һимайә қилидиғанлиқини, шуниңдәк сиясий мәвқә, сиясий принсип вә вә сиясий йөнилиштә бейҗиң билән йүксәк бирдәкликни сақлайдиғанлиқини билдүргән. Шуниңдәк “ши җинпиңниң шинҗаң хизмити һәққидики муһим көрсәтмилирини толуқ иҗра қилип, партийә мәркизи комитетиниң шинҗаңни идарә қилиш истратегийәсини, болупму иҗтимаий муқимлиқ вә узақ мәзгиллик әминликни әмәлгә ашурушқа бәл бағлаймиз,” дегән.

Йиғинда өмәк әзалиридин әркин имирбақи, шөһрәт закир вә биңтуәнниң қомандани сун җинлоңму пикир баян қилип, “ши җинпиңниң рәһбәрликидә шинҗаң хизмитидә зор илгириләш барлиққа кәлди. Буниңдин кейин бу утуқларни техиму йүксәлдүримиз,” дегән.

Д у қ ниң баянатчиси дилшат решит бу һәқтә пикир қилип, “чен чуәнгониң бу хил баянлири буниңдин кейин уйғур җәмийити дуч келидиған бастурушларниң техиму еғирлишидиғанлиқидин берилгән бешарәт,” деди.