Atalmish "Shinjang wekiller ömiki" ning guruppa muzakirisi buningdin kéyinki weziyettin bésharet bermekte

Muxbirimiz eziz
2019-03-06
Élxet
Pikir
Share
Print

Béyjingda échiliwatqan 13-nöwetlik xelq qurultiyining 2-omumi yighinigha qatnishiwatqan atalmish "Shinjang wekiller ömiki" 5-mart küni hökümet xizmitidin bérilgen doklatni mexsus muzakire qilghan. Shuning bilen birge bu jeryanda buningdin kéyinki xizmetning omumiy nishani heqqide bezi qararlar élin'ghan.

"Tengritagh tori" ning 6-marttiki xewiride éytilishiche, xitay sékrétar chén chu'en'go ömek bashliqi bolghan mezkur wekiller ömiki ömek yighini achqan. Chén chu'en'go söz qilip xitay bash ministiri lé kéchyangning hökümet xizmiti heqqide bergen doklatini toluq qollaydighanliqini, özlirining shi jinping bashchiliqidiki xitay rehberlik qatlimi békitip bergen siyasiy prinsip ölchimi we tüplük siyasiy qa'idilerni qet'iy himaye qilidighanliqini, shuningdek siyasiy mewqe, siyasiy prinsip we we siyasiy yönilishte béyjing bilen yüksek birdeklikni saqlaydighanliqini bildürgen. Shuningdek "Shi jinpingning shinjang xizmiti heqqidiki muhim körsetmilirini toluq ijra qilip, partiye merkizi komitétining shinjangni idare qilish istratégiyesini, bolupmu ijtima'iy muqimliq we uzaq mezgillik eminlikni emelge ashurushqa bel baghlaymiz," dégen.

Yighinda ömek ezaliridin erkin imirbaqi, shöhret zakir we bingtu'enning qomandani sun jinlongmu pikir bayan qilip, "Shi jinpingning rehberlikide shinjang xizmitide zor ilgirilesh barliqqa keldi. Buningdin kéyin bu utuqlarni téximu yükseldürimiz," dégen.

D u q ning bayanatchisi dilshat réshit bu heqte pikir qilip, "Chén chu'en'goning bu xil bayanliri buningdin kéyin Uyghur jem'iyiti duch kélidighan basturushlarning téximu éghirlishidighanliqidin bérilgen bésharet," dédi.

Toluq bet