Xitay, “Shinjang paxtisi” din hezer eyligen amérika shirkitini “Ishenchisiz shirketler tizimliki” ge kirgüzgen

Xitay soda ministirliqi 4-féwral küni, “Shinjang paxtisi” ishlitishtin hezer eylep kelgen amérikaning dangliq markiliq kiyim-kéchekliridin kalwin klayinning bash shirkiti PVH bilen amérikaning illumina (Illumina) bi'o-téxnika shirkitini “Ishenchisiz shirketler” tizimlikige kirgüzgenlikini élan qilghan.

Roytérs agéntliqining bildürüshiche, pirézidént trampning barliq xitay mallirigha 10 pirsent baj qoyush qarari resmiy ijra qilinishqa bashlighan peytte, xitayning yuqiriqi ikki amérika shirkitini “Ishenchisiz” dep élan qilishi xitay da'irilirining tramp bilen sözliship, omumyüzlük soda urushi yüz bérishining aldini élishqa urunushini ipadileydiken. Xitay soda ministirliqi ötken yili PVH ning “Shinjang paxta mehsulatliri” ni kemsitishige qarita bu shirketning ikki dangliq markisi - kalwin klayin bilen tami xélfigér üstidin tekshürüsh élip baridighanliqini élan qilghanidi. Buning aldida PVH ning öz mal teminligüchilirini Uyghur mejburiy emgiki seweblik “Shinjang paxtisi” ishletmeslik heqqide agahlandurghanliqi melum bolghan.

Shuning bir bir waqitta amérika dölet mejlisi ötken yili dölet bixeterlik endishisi sewebidin qanun maqullap, xitayning BGI namliq dangliq gén tetqiqat shirkitini chekligen. BGI Ning az dégende ikki tarmaq shirkiti Uyghurlarning DNA tetqiqati bilen shughullinip, xitay hökümitining basturushigha yardem bérishi seweblik amérikaning “Qara tizimliki” ge kirgüzülgenidi. Xitay soda ministirliqining illumina shirkitini “Ishenchisiz” dep élan qilishi, amérikaning tamozhna béji jazasi we BGI ni cheklishige qayturghan inkasi, dep qaralmaqta.

Shinxu'a agéntliqining xewer qilishiche, xitay soda ministirliqining qararida yuqiriqi her ikki shirket “Bazarning normal soda pirinsiplirigha xilapliq qilish, xitay shirketliri bilen bolghan normal sodini bikar qilish, xitay shirketlirige qarshi kemsitish xaraktérlik tedbirlerni yürgüzüp, bu shirketlerning qanunluq hoquqi hem menpe'etige ziyan sélish” bilen eyiblen'gen. Lékin “Yaxu maliye xewerliri” ning bildürüshiche, PVH “Inwéstopidiye” ge bergen bayanatida, “PVH Alaqidar barliq qanun-nizamlargha qattiq ri'aye qilidu hemde mewjut sana'et ölchimi we emeliyiti boyiche meshghulat qilidu” dep körsetken.