Xitay hökümitining “Shinjanggha yardem bérish xizmet yighini” guman qozghimaqta

Xitay hökümiti bashqurushidiki “Tengritagh tori” ning 18-awghusttiki xewiride éytilishiche, xitay bash ishchilar uyushmisining “Shinjanggha yardem bérish memliketlik xizmet yighini” da herqaysi xitay ölkilirining “Yardem shekilliri” nuqtiliq muzakire qilin'ghan. Xitay bash ishchilar uyushmisi partguruppisining sékrétari chén gang yighinda söz qilip “Herqaysi ölkilik ishchilar uyushmilirining shinjanggha yardem bérish xizmitige ishtirak qilghanliqigha yüksek éhtiram bildürimen” dégen.

Halbuki xewerde xitay ölkilirining “Shinjanggha yardem bérishi” diki türlerning “Muqimliq we ebediy eminlik ornitishtek bash nishanning emelge éshishigha yéqindin hemdemde bolush, yéngi dewrdiki shinjangni idare qilish istratégiyesini toluq we mukemmel ijra qilish, jungxu'a ortaq kimliki chüshenchisini asasiy ghol idiye qilish” dégenler ikenliki alahide tekitlen'gen. Shuningdek pütkül xewerde héchqandaq iqtisadiy jehettiki yardem mezmunining tilgha élinmasliqimu bu xil “Yardem” ning mahiyette nöwette ijra qiliniwatqan assimilyatsiye we basturushqa wasitilik yaki biwasite halda “Yardem” bérish bolidighanliqini körsetmektiken.

Uyghur aptonom rayonluq partkomning sékrétari ma shingrüy yighinda alahide söz qilip؛ “Memliketlik bash ishchilar uyushmisi uzundin buyan shinjanggha yardem bérish arqiliq partiye merkiziy komitétining omumi orunlashturushlirini ijra qilish, shinjangning muqimliqi we yéngi dewrdiki shinjangni idare qilish xizmetlirige zor töhpe qoshti” dégen. Shuningdek xitay bash ishchilar uyushmisining yardimi asasida nöwettiki “Medeniyet arqiliq shinjangni sughirish, keng xelq ammisini partiye etrapigha zich uyushturush” ni qet'iy dawamlashturush, shu arqiliq 20-qurultayni kütüwélishqa pa'al teyyarliq qilish lazimliqini tekitligen.

Xitay hökümitining “Jungxu'a ortaq kimliki chüshenchisini omumlashturush” namida xitaylashturushni, “Ijtima'iy muqimliq berpa qilish” namida Uyghurlarni basturushni dawam qilishi heqqide söz bolghanda jorjtawn uniwérsitétining proféssori jéymis milward “Xitay hökümiti hazir <axirqi hel qilish> charisi arqiliq Uyghurlar mesilisini ebediylikke hel qilishqa bel baghlimaqta” dégenidi.