Уйғур райони хитай компартийисиниң 19‏-қурултийиға қатнишидиған вәкиллирини “сайлап” чиққан

Уйғур аптоном районлуқ партком пәйшәнбә күни йиғин чақирип, хитай компартийисиниң 19‏-қурултийиға қатнишидиған уйғур райони вәкиллирини “сайлап” чиққан. “шинҗаң гезити” ниң хәвәр қилишичә, хитай компартийисиниң 19‏‏-қурултийиға бу йил уйғур районидин 43 вәкил қатнишидикән. Бу 43 вәкил пәйшәнбә күнки йиғинда “сайлап” чиқилған.

Хәвәрдә, бу 43 вәкилниң хитай компартийиси сиясий бюро даимий әзаси, хитай сиясий кеңишиниң рәиси йү җиңшең билән хитай хәлқ қурултийиниң муавин мудири әркин имирбақиниң барлиқини билдүрди. Хәвәрдә, қәйт қилишичә, йү җиңшең билән әркин имирбақини мәркәз намзат қилип чүшүрүп бәргән. Әркин имирбақиниң уйғур районидин вәкил болуп сайлиниши чүшинишлик болсиму, бирақ йү җиңшеңниң мәзкур райондин вәкил болуп сайлиниши көзәткүчиләрниң диққитини қозғиди. Йү җиңшең хитай мәркизи сиясий қанун комитетиниң сабиқ секретари җу йүңкаңдин кейин партийә қурултийиға уйғур районидин вәкил болуп қатнишидиған 2‏-сиясий бюро даимий әзаси. 

Хитай компартийисиниң 2012‏-йилидики 18‏-қурултийида җу йүңкаң уйғур районидин вәкил болуп сайланған. Бирақ у бир йилдин кейин қолға елинип, 2015‏-йили муддәтсиз қамақ җазасиға һөкүм қилинған иди. 

Җу йүңкаң йиқилғандин кейин “шинҗаң хизмити” ни башқурушни йү җиңшең үстигә алған. Бирақ хәвәрдә, хитайниң 19‏-нөвәтлик партийә қурултийиға қатнишидиған уйғур райони вәкиллириниң миллий тәркиби, йүниң партийә қурултийиға немә үчүн бейҗиң яки у узун йил хизмәт қилған шәндуң, хубей, шаңхәй вә яки туғулған юрти шәншидин әмәс, уйғур районидин вәкил болғанлиқи тилға елинмиған.