Хәлқара кәчүрүм тәшкилати: хитайда түрмидики кишилик һоқуқ адвокати қийин - қистаққа елиниш хәтиридә

Хәлқара кәчүрүм тәшкилати 29 - июл җиддий баянат елан қилип, хитайда түрмидики кишилик һоқуқ адвокати рен чүәннюниң қийин - қистаққа елиниш хәтиридә туруватқанлиқини билдүрди вә хәлқара җәмийәтни буниңға қарши дәрһал һәрикәт қоллинишқа чақириди.

Нөвәттә җеңҗу шәһәрлик 3 - тутуп туруш орниға қамақлиқ рен чүәнню йеқинда қолға елинған кишилик һоқуқ адвокати җав вейниң адвокати болуп, у, җав вейниң түрмидә сақчиларниң җинсий паракәндичилик селишиға учриған болуши мумкинликини елан қилғандин кейин, 9 - июл “җедәл чиқирип, қалаймиқанчилиқ туғдурди” дәп әйиблинип тутуп кетилгән.

Җеңҗу сақчи даирилири рен чүәннюниң өзиниң “җинайити” ни иқрар қилғанлиқини билдүргән болсиму, бирақ у 11 - июл оз адвокатиға буниң ялғанлиқини ейтқан.

Хәлқара кәчүрүм тәшкилати баянатида, униң 11 - июл күни түрмигә өзини зиярәт қилғили кәлгән адвокати билән бир қетим көрүштүрүлгәндин буян, сирт билән болған алақиси үзүлгәнликини көрсәткән.

Баянатқа қариғанда, 16 - июл өзини җав вейниң адвокати, дәп атиған җи хүййүн исимлик бир киши “вейбо” ға рен чүәннюниң язғанлиқи илгири сүрүлгән бир парчә хәтни чаплиған.

Рен чүәннюниң 15 - июл имза қойғанлиқи көрситилгән бу хәттә, униң җав вейниң түрмидә сақчиларниң җинсий паракәндичилик қилишиға учриғанлиқидин ибарәт сахта учурни йоллиғанлиқидин турмә даирилиридин әпу сориғанлиқи йезилған икән.

Рен чүәнню аилиси тапқан адвокатлардин ву куймиң вә ма лйәншүнләр 28 - июл түрмә даирилириниң өткән 11 күндин буян униң билән көрүшүш тәлипини рәт қилғанлиқини ейтишқан.

Баянатта көрситишичә, рен чүәннюниң достлири униң түрмидә мәзкур хәтни йезишқа мәҗбурланғанлиқиға ишинидиғанлиқини билдүрүшкән.

Хәлқара кәчүрүм тәшкилати юқири сәвәбләрни көздә тутуп, рен чүәннюниң түрмидә қейин - қистаққа елиниш, тән җазасиға учраш хәтиридә туруватқанлиқини көрсәткән һәмдә хәлқара җәмийәтни хитай һөкүмити вә җеңҗу шәһәрлик турмә даирилиригә мәктуп йоллап, чүәннюни дәрһал қоюп беришкә чақиришқа дәвәт қилған.

Хитай һөкүмити йеқини йиллардин буян хитайдики кишилик һоқуқ адвокатлириға қаритилған бастурушни күчәйткән. Бу җәрянда 200 дин артуқ адвокатиниң тутқун қилинғанлиқи, бир қисимлириниң тәһдит селинғандин кейин қоюп берилгән болсиму, йәнә 20 нәпириниң тутқунда икәнлики хәвәр қилинған иди.