Xelq'ara kechürüm teshkilati: xitayda türmidiki kishilik hoquq adwokati qiyin - qistaqqa élinish xetiride

Muxbirimiz jüme
2016-07-30
Share


Xelq'ara kechürüm teshkilati 29 - iyul jiddiy bayanat élan qilip, xitayda türmidiki kishilik hoquq adwokati rén chüennyuning qiyin - qistaqqa élinish xetiride turuwatqanliqini bildürdi we xelq'ara jem'iyetni buninggha qarshi derhal heriket qollinishqa chaqiridi.

Nöwette jéngju sheherlik 3 - tutup turush ornigha qamaqliq rén chüennyu yéqinda qolgha élin'ghan kishilik hoquq adwokati jaw wéyning adwokati bolup, u, jaw wéyning türmide saqchilarning jinsiy parakendichilik sélishigha uchrighan bolushi mumkinlikini élan qilghandin kéyin, 9 - iyul "Jédel chiqirip, qalaymiqanchiliq tughdurdi" dep eyiblinip tutup kétilgen.

Jéngju saqchi da'iriliri rén chüennyuning özining "Jinayiti" ni iqrar qilghanliqini bildürgen bolsimu, biraq u 11 - iyul oz adwokatigha buning yalghanliqini éytqan.

Xelq'ara kechürüm teshkilati bayanatida, uning 11 - iyul küni türmige özini ziyaret qilghili kelgen adwokati bilen bir qétim körüshtürülgendin buyan, sirt bilen bolghan alaqisi üzülgenlikini körsetken.

Bayanatqa qarighanda, 16 - iyul özini jaw wéyning adwokati, dep atighan ji xüyyün isimlik bir kishi "Wéybo" gha rén chüennyuning yazghanliqi ilgiri sürülgen bir parche xetni chaplighan.

Rén chüennyuning 15 - iyul imza qoyghanliqi körsitilgen bu xette, uning jaw wéyning türmide saqchilarning jinsiy parakendichilik qilishigha uchrighanliqidin ibaret saxta uchurni yollighanliqidin turme da'iriliridin epu sorighanliqi yézilghan iken.

Rén chüennyu a'ilisi tapqan adwokatlardin wu kuyming we ma lyenshünler 28 - iyul türme da'irilirining ötken 11 kündin buyan uning bilen körüshüsh telipini ret qilghanliqini éytishqan.

Bayanatta körsitishiche, rén chüennyuning dostliri uning türmide mezkur xetni yézishqa mejburlan'ghanliqigha ishinidighanliqini bildürüshken.

Xelq'ara kechürüm teshkilati yuqiri seweblerni közde tutup, rén chüennyuning türmide qéyin - qistaqqa élinish, ten jazasigha uchrash xetiride turuwatqanliqini körsetken hemde xelq'ara jem'iyetni xitay hökümiti we jéngju sheherlik turme da'irilirige mektup yollap, chüennyuni derhal qoyup bérishke chaqirishqa dewet qilghan.

Xitay hökümiti yéqini yillardin buyan xitaydiki kishilik hoquq adwokatlirigha qaritilghan basturushni kücheytken. Bu jeryanda 200 din artuq adwokatining tutqun qilin'ghanliqi, bir qisimlirining tehdit sélin'ghandin kéyin qoyup bérilgen bolsimu, yene 20 nepirining tutqunda ikenliki xewer qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet