Ayal kishilik hoquq adwokati xitayning amérikigha bérip mukapat tapshuruwélishigha tosqunluq qilghanliqini tenqid qildi

Amérika hökümitining “Xelq'ara jesur ayallar mukapati” gha érishken méyip xitay kishilik hoquq adwokati ni yülen, xitay saqchilirining amérikigha bérip mukapat tapshuruwélishigha tosqunluq qilghanliqini tenqid qilghan.

Mukapat tarqitish murasimi seyshenbe küni amérika dölet ishlar ministirliqida ötküzülgen idi. Murasimda dölet ishlar ministiri jon keriy nutuq sözlep, ni yülenning “Xitayda qanun bilen idare qilish, toluq we teng barawerlik hoquqini qoghdash yolidiki yétekchilik roli” ni maxtighan.

Amérika dölet ishlar ministirliqi her yili her qaysi ellerdiki tinchliq, adalet, kishilik hoquq, ayallar barawerliki qatarliq mesililerde alahide rol oynighan ayallargha “Xelq'ara jesur ayallar mukapati” bérip kelgen. Bu yil 14 ayal bu mukapatni alghan. Ni yülen shularning biri idi.

Ni yülenning peyshenbe küni firansiye agéntliqigha bergen uchurida ashkarilishiche, saqchilar uning seperge chiqishigha yol qoymighan hem pa'aliyitini toxtitishini telep qilghan. U firansiye agéntliqigha “Bu, pütünley méning shexsi erkinlikimni chekligenlik” dégen.

Lékin, xitay hökümiti amérikining ni yülen'ge mukapat bérishide “Bashqa gherizi” bar, dep tenqid qildi.

Xitay tashqi ishlar ministirliqi bayanatchisi xung léy peyshenbe küni “Amérikining undaq ademge mukapat bérishide bashqa gherizi bar. Biz chet'el hökümetlirining kishilik hoquqni qollinip, xitayning ichki ishlirigha qol tiqishigha qarshi turimiz” dégen.