Adwokat wang yüning xitayning bésimi seweblik xelq'araliq mukapatini ret qilghanliqi melum

Firansiyening parizh shehiridiki lodiwék trari'oks kishilik hoquq mukapat fondi 2-awghust bayanat élan qilip, bu yil 4-iyun küni “Lodiwék trari'oks xelq'ara kishilik hoquq mukapati” gha körsitilgen xitaydiki kishilik hoquq adwokati wang yüning xitay hökümitining bésimi bilen mezkur mukapatni ret qilghanliqini, xitay hökümitining bu mukapatni uninggha bérishni wede qilghan “Erkinlik”ke tégishishke mejburlighanliqini eyiblidi.

Melum bolushiche, “Dölet hakimiyitini aghdurush” jinayiti bilen tutqun qilinip, bir yildin buyan xitay türmiside yétiwatqan adwokat wang yü 1-awghust düshenbe küni qoyup bérilgendin kéyin, xongkongdiki sumurgh téléwiziyisining ziyaritini qobul qilip, bu yil 6-ayning 4-küni özige bérilgen “Lodiwék trari'oks kishilik hoquq mukapati” ni qobul qilmaydighanliqini bildürgen we özi ilgiri xizmet qilghan béyjing féngrüy adwokatlar bashqarmisini “Erzdarlarni qutritip qalaymiqanchiliq tughdurushqa urun'ghan” dégen ibariler bilen eyiblep, özi ilgiri mezkur adwokatlar bashqarmisida adwokatliq qilghan mezgilidiki pa'aliyetliridin qattiq pushayman qilghanliqini bildürgen.

Xitaydiki kishilik hoquq adwokati wang yü, béyjing féngrüy kishilik hoquq adwokatlar bashqarmisining gholluq adwokati. U bultur yaz peslide xitayda 300 din artuq adwokat we kishilik hoquq aktipliri tutqun qilin'ghan “ 9-Iyul kishilik hoquq adwokatlirini tutqun qilish” weqeside resmiy qolgha élin'ghan 20 din artuq adwokatning biri.

Da'iriler 1-awghust düshenbe küni tuyuqsiz sot waqtining özgergenlikini élan qilip, adwokat wang yüni qoyup bergen. Emma 2-awghust tyenjinde échilghan sotta eyni chaghda wang yü bilen birlikte tutqun qilin'ghan bashqa kishilik hoquq pa'aliyetchiliri we adwokatlar üstidin höküm élan qilghan.