Атақлиқ хитай адвокат “һакимийәтни ағдурушқа қутратқулуқ қилиш” билән тутуп турулған

Атақлиқ хитай адвокат җяң тйәнюң “һакимийәтни ағдурушқа қутратқулуқ қилиш” билән әйиблинип тутуп турулған. Җяң тйәнюң бу йил 11‏-айда чаңшада из ‏-дерәксиз ғайиб болғандин кейин, хитай һөкүмити йеқинда униң чаңшадики бир орунда нәзәрбәнд қилинғанлиқини билдүргән иди.

Ройтерс агентлиқиниң җүмә күни билдүрүшичә, җяң тйәнюңниң адвокати чин чеңшу, бу, даириләрниң җяң тйәнюңни рәсмий әйиблишигә йол ечип беридиғанлиқини билдүргән. Хитай “қанун гезити” өткән һәптә мақалә елан қилип, җяң тйәнюңниң йенидин дөләт мәхпийәтликигә аит материяллар тепилғанлиқини, у, бу материялларни чәтәлгә әвәтмәкчи, дәп гуман қилинииватқанлиқини билдүргән.

Лекин җяң тйәнюңниң адвокати җүмә күни ройтерс агентлиқиға бәргән баянатида, сотниң һечқандақ һөкүми йоқ туруп, униң бундақ әйиблиниши бинормал әһвал дегән. Җяң тйәнюң илгири нурғун кишилик һоқуқ делолириниң адвокатлиқини үстигә алған иди.

У йәнә, уйғур өктичи зиялийси илһам тохтиниң өмүрлүк қамақ җазасиға һөкүм қилиниши, хитайниң “5‏-июл вәқәси”дә алаһидә сот мәһкимилирини қуруп, намайишқа қатнашқан уйғурларни кәң көләмлик сотлиши, аммиви сот ечип җазалиши қатарлиқларни “қанунсизлиқ” дәп әйиблигән.

Б д т ниң намратлиқ вә кишилик һоқуқ мәсилилирини тәкшүрүш әмәлдари филип алстон бу айниң башлирида униңға ғайиб болушиниң өч елиш һәрикити икәнликидин әндишә қилидиғанлиқини билдүргән. У, бу йил 8‏-айда хитайда тәкшүрүш елип барғанда униң билән көрүшкән иди.