Xitay ölkiliridiki aliy mektep oqughuchilirining Uyghur éligha bérishi teshebbus qilinmaqta

Uyghur élidiki yashlar xizmet tapalmaywatqan bir shara'it astida, xitay ölkiliridiki aliy mektep oqughuchiliri Uyghur élige kélip ishleshke teklip qilin'ghan. Xelq torining xewiridin qarighanda, 1 - awghust küni, xitayning béyjing, shendung, xénen, enxuy qatarliq ölke, sheherliridin kelgen jem'iy 1800 neper aliy neper aliy mektep oqughuchisi Uyghur élidiki herqaysi wilayetlerge arzusi boyiche xizmetke teqsim qilin'ghan. Bularning ichide xoten wilayitige orunlashqanlarning sani 127 neper iken.

Melum bolushiche, bu oqughuchilar “Aliy mektep oqughuchiliri gherbiy rayon pilani pida'iyliri” dégen nam boyiche Uyghur éligha kelgenler bolup, xewerde bu heqte mundaq diyilgen : “Aliy mektep oqughuchiliri pida'iylar mulazimiti partiye we döletning gherbiy rayonni keng échish istratégiyesidiki muhim tedbir bolup, u, gherbiy rayonning tereqqiyatini tézlitish we eqliy medet bilen teminleshtiki muhim yol hésablinidu.”

Chet'ellerdiki Uyghur közetküchiliridin élshat hesen ependi buni xitay hökümitining pilanliq we teshkillik halda Uyghur éligha xitay köchmen yötkesh siyasitining bir qismi, dep körsetti. U, Uyghur rayon da'irilirining xitay ölkiliridiki aliy mektep oqughuchilirini ish bilen teminlesh arqiliq, ularni Uyghur élida yerliship qélishqa teshebbus qiliwatqanliqini bildürdi.

Derweqe, tengritagh torining bu heqtiki xewiridin qarighanda, yuqiridiki pilan'gha asasen 2003 - yilidin buyan hazirghiche xitay ölkiliridin 15 mingdin artuq aliy mektep oqughuchisi Uyghur éligha kelgen we ularning arisidin 5000 din artuqi Uyghur élige makanliship qalghan iken.