Nyut gin'grich: "Xitay amérika musteqilliq urushidin béri duch kelgen eng chong tehdit"

Amérikaning sabiq awam palata re'isi nyut gin'grich ötken heptining axiri nutuq sözlep, xitayning "Amérika musteqilliq urushidin béri duch kelgen eng chong xeter" ge aylan'ghanliqini bildürgen.

Amérika awam palatasining mezkur sabiq jumhuriyetchi re'isi bu sözlerni 2‏-noyabir küni sabiq prézidént niksonning namigha qurulghan "Nikson kitabxanisi" da nutuq sözligende tekitligen. Nyut gingrich 1990‏-yillardiki sabiq prézidént bil klinton dewride amérika awam palatasining re'isilik wezipisini atqurghan. U eyni waqitta xitayning dunya soda teshkilatigha qobul qilinishini qollighan siyasiyonlarning biri idi. Lékin, gin'grich shenbe küni sözligen nutuqida, özining xatalashqanliqini étirap qilghan. U: "Eyni waqitta men xitay tereqqi qilsa téximu échiwétilgen démokratik jemiyetke qarap mangidu, dégen'ge ishen'gen kishilerning biri idim. Men uning dunya soda teshkilatigha eza bolushi mentiqiliq, chünki, qa'ide tüzüm asasigha qurulghan bir teshkilatqa kirishi uning qanun bilen idare qilish yoligha méngishigha türtke bolidu, dep oylayttim" dégen.

Uning ilgiri sürüshiche, uning bundaq oyda bolushigha déng shawpingning 1992‏-yili sözligen omumyüzlük bazar iqtisadigha köchüsh toghrisidiki nutuqi halqiliq rol oynighan. Lékin gin'grich özining pütünley xatalashqanliqini tekitlep, déng shawpingning pilani bilen gherbning chüshenchisi pütünley qarmu-qarshi meqsetni chiqish qilghanliqini bildürgen. Uning ilgiri sürüshiche, shi jinping xitay kompartiyesining bash sékritari bolsimu, lékin xitayning chet'elliklerge uni prézidént, dep xitap qilidighanliqi, shi jinpingning lénin, stalin, maw zédonggha oxshash diktatur bolsimu, lékin ularning shi jinpingni prézidént, dep atishi chet'elliklerde uninggha qarita "Normal tesirat" peyda qilish ikenlikini tekitligen. Gin'grich yene shi jinpingning xizmiti kompartiyening izchil hökümranliqini saqlash we uni kücheytish ikenlikini tekitlep, "Men ishinimenki, ular sowét ittipaqi we natsistlar gérmaniyesidinmu chong tehdit. Rastini éytqanda, méningche ular biz 1770‏-yillirida duch kelgen britaniye impériyesidinmu chong tehdid" dégen.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar