Хитай америка авиаматкисиниң хоңкоңни зиярәт қилишиға йол қоймиди

Хитай һөкүмити америка авиаматкиси - җон стәнисниң хоңкоң портини зиярәт қилиш тәлипини рәт қилған. Америка авиаматкисиниң хоңкоңни зиярәт қилиш тәлипиниң рәт қилиниш сәвәби мәлум болмисиму, әмма бу америка билән хитайниң җәнубий деңиз мәсилисидики ихтилапи кәскинләшкән мәзгилдә йүз берип, диққәт қозғиди.

Америка дөләт мудапиә министирлиқи баянатчиси бил урбан җүмә күни мухбирларға “йеқинда бизгә җон стәнис намлиқ авиаматка вә башқа уруш парахотлиридин тәшкил тапқан америка деңиз флотиниң хоңкоңни зиярәт қилиш тәлипи рәт қилинғанлиқи уқтурулди” деди.

Бил урбанниң қәйт қилишичә, бу 2014 - йилдин буян америка уруш парахотлириниң хоңкоңни зиярәт қилиш тәлипиниң тунҗи қетим рәт қилинишикән. У, “блу риҗ” намлиқ америка уруш парахотиниң хоңкоңни зиярәт қилғанлиқини билдүрүп, “биз буниң давамлишишини үмид қилимиз” дегән.

Йеқинда америка билән филиппин җәнубий деңизда һәрбий маневир өткүзгән. Шу мәзгилдә җон стәнис намлиқ авиаматка җәнубий деңиздики хитай игилик һоқуқ дәваси қиливатқан бир аралниң әтрапида бир мәзгил ләңгәр ташлап турған.

Америка дөләт мудапиә министири аштон картер 15 - апрел авиаматкиға чиқип, әгәр филиппин башқиларниң зорлиши вә тәһдитигә учриса, америка филиппинни қоллайдиғанлиқини билдүргән иди.

Хоңкоңдики “җәнубий хитай сәһәр гезити” ниң хәвәр қилишичә, хитай ташқи ишлар министирлиқи җүмә күни америка авиаматкисиниң рәт қилиниши, “игилик һоқуқ принсипи вә алаһидә әһвални көздә тутуп чиқирилған индивидуал вәқә” дегән.