Xitay amérika awi'amatkisining xongkongni ziyaret qilishigha yol qoymidi

Xitay hökümiti amérika awi'amatkisi - jon stenisning xongkong portini ziyaret qilish telipini ret qilghan. Amérika awi'amatkisining xongkongni ziyaret qilish telipining ret qilinish sewebi melum bolmisimu, emma bu amérika bilen xitayning jenubiy déngiz mesilisidiki ixtilapi keskinleshken mezgilde yüz bérip, diqqet qozghidi.

Amérika dölet mudapi'e ministirliqi bayanatchisi bil urban jüme küni muxbirlargha “Yéqinda bizge jon stenis namliq awi'amatka we bashqa urush paraxotliridin teshkil tapqan amérika déngiz flotining xongkongni ziyaret qilish telipi ret qilin'ghanliqi uqturuldi” dédi.

Bil urbanning qeyt qilishiche, bu 2014 - yildin buyan amérika urush paraxotlirining xongkongni ziyaret qilish telipining tunji qétim ret qilinishiken. U, “Blu rij” namliq amérika urush paraxotining xongkongni ziyaret qilghanliqini bildürüp, “Biz buning dawamlishishini ümid qilimiz” dégen.

Yéqinda amérika bilen filippin jenubiy déngizda herbiy manéwir ötküzgen. Shu mezgilde jon stenis namliq awi'amatka jenubiy déngizdiki xitay igilik hoquq dewasi qiliwatqan bir aralning etrapida bir mezgil lengger tashlap turghan.

Amérika dölet mudapi'e ministiri ashton kartér 15 - aprél awi'amatkigha chiqip, eger filippin bashqilarning zorlishi we tehditige uchrisa, amérika filippinni qollaydighanliqini bildürgen idi.

Xongkongdiki “Jenubiy xitay seher géziti” ning xewer qilishiche, xitay tashqi ishlar ministirliqi jüme küni amérika awi'amatkisining ret qilinishi, “Igilik hoquq prinsipi we alahide ehwalni közde tutup chiqirilghan indiwidu'al weqe” dégen.