Хитайниң баш дипломати америка һөкүмитини сөһбәтлишишкә чақирди

Мухбиримиз әзиз
2023.01.03

Хитайда қайтидин әвҗигә чиқишқа башлиған таҗсиман вирус өткән үч йилдин буян хитайниң иқтисадий җан томурини қаттиқ һалсиратқан болуп, буниң бир типик ипадиси хитайниң сабиқ ташқи ишлар министири ваң йи оттуриға қойған “америка һөкүмити билән сөһбәтлишиш һәмдә шу арқилиқ чигишләрни йешиш” тәклипидә әкс әтти.

Ройтерис агентлиқиниң 1-январдики хәвиридә ейтилишичә, ваң йи вәзиписидин айрилғандин кейин хитай компартийәсиниң нәшр әпкарлиридин болған “һәқиқәтни әмәлийәттин издәш” журнилиниң 1-январ санида баш мақалә елан қилған һәмдә юқириқи тәклипни оттуриға қойған. У баш мақалида “өткән йилларда америка вә хитай изчил өзара әп өтүшниң йоллири тоғрисида издинип кәлди. Икки тәрәп өзара һөрмәт, тинчлиқта биллә туруш вә һәмкарлиқ асасида иш көрүш һәмдә сөһбәтлишиш асасида америка-хитай мунасивитини тоғра, сағлам вә мәзмут йолға селиши лазим” дегән.

Америка ташқи ишлар министири антони билинкен әпәнди 1-январ күни хитайниң йеңи ташқи ишлар министири чин гаң билән телефон арқилиқ сөһбәтләшкән. У өзиниң тивиттер бетидә бу һәқтә учур берип “биз америка-хитай мунасивити һәмдә өзара пикир алмаштурушниң очуқ йоллири һәққидә кәң-кушадә сөһбәтләштуқ” дегән.

Хәвәрдә ейтилишичә, ваң йи 2023-йили йетип келиш һарписида вәзиписидин айрилған болсиму униң изчил ши җинпиңниң әң ишәнчлик адәмлириниң бири икәнлики, шундақла униң техи йеқиндила сиясий бюро әзалиқиға өстүрүлгәнлики түпәйлидин ташқи дуня изчил түрдә ваң йини “хитай дипломатийә саһәсиниң пәрдә арқисидики қомандани” дәп қаримақтикән. Дәрвәқә ваң йи бу қетим оттуриға қойған “сөһбәтлишиш арқилиқ мәсилини һәл қилиш” чақириқи 2021-йили март ейида аляска штатида өткүзүлгән америка-хитай рәһбәрлири сөһбәт йиғинида хитай һөкүмити намаян қилған тәкәббуранә көрәңлик билән рошән селиштурма һасил қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.